III Alcuentru de Fútbol Popular
Los díes 29, 30 y 31 de Xunetu va tener llugar nel barriu de Ciares, na ciudá asturiana de Xixón, el “III Alcuentru de Fútbol Popular”.
Lo mesmo que los anteriores alcuentros vivíos primero en Palencia y dempués en Murcia, va ser un llugar de puesta en común pa clubes xestionaos polos aficionaos y que desendolcamos un fútbol participativu, inclusivu y sostenible.
Vamos compartir esperiencies col oxetivu d’ameyorar los nuestros respectivos proyectos, deprendiendo de los aciertos y erros de cada club nel camín andáu hasta’l momentu, en temes como participación, fútbol femenín, fútbol adaptáu, grada d’animación…
Así mesmo tamién vamos cuntar con colectivos d’aficionaos y hinches a títulu individual que sofiten esta filosofía y que traten de que’l so equipu avance hacia esti modelu, arriqueciendo tovía más l’alcuentru.
Si quies participar nel “III Alcuentru de Fútbol Popular”, puedes inscribite visitando la nuestra páxina d’inscripción de forma totalmente gratuita.