[Ḷḷenense 2-2 Ciares] Duru golpe nel descuentu

El Ciares adelantrose por dos veces, llegando al descansu con 0-2. Na segunda parte apertaron los locales retayando distancies con un penalti que supunxo la espulsión de Rigo. En tiempu de descuentu Pedro Luis punxo’l definitivu empate. Un centenar de ciaristas arropó al equipu.

Desplazamientu esperáu pola afición ciarista. Pese al horariu, un centenar d’hinches dieronse cita n’El Sotón p’animar a los suyos. El Ḷḷenense ye unu de los equipos más fuertes en casa de tola lliga, con solu dos derrotes nel so campu. Esa solidez viose’l Domingu.

El partíu empezó col primer plasmu: namás sacar de centru del campu, el Ḷḷenense entra per banda derecha y dende dientro de la área disparen esviáu por pocu. Poco dempués, nel 4, córner pal Ciares, balón al segundu palu onde Borja Noval engabita de volea y robla el primeru de la tarde. Xugada marca de la casa. El conxuntu teyeru empieza a espurrise. Borja Argüelles álzase como protagonista ofensivu. Contraataque que lleva l’estremu xixonés y remata con un disparu descomanadamente cruciáu.

Pasáu’l 30′ protagoniza una nueva xugada individual Argüelles na que regatia a dos rivales na mesma llínea de fondu, sigue funambulando por ella asonsañando la famosa xugada de Butragueño, da’l pase tras, y cuando Jimmy disponíase a emburriala a la rede, un defensa estena bien oportunu. El Ḷḷenense tamién tien les sos oportunidaes. Entrada per banda d’Adrián Sanz, centru a la área, y Guille remata en semifallu llegando’l balón a Kike. El porteru visitante amosóse bien seguru ya inclusive tuvo qu’evitar un gol olímpicu del equipu de La Pola.

Al filu del descansu, nel ’42, Pelayo Torre entra bien habilidosu pel estremu esquierdu, retaya, enfúsase na área y cai baltáu pola entrada en tackling del acabante incorporase Adrián Fuertes. Penalti pa sorpresa de xugadores y aficionadoes ḷḷenizos. El llateral asumió munchos riesgos realizando una entrada tan fuerte dientro de la área, pero paez que toca balón antes d’arollar al mediapunta xixonés. Borja Noval dispara y bate a Adrián Torres. 0-2 y descansu n’El Sotón; ratos de bon xuegu del Ciares, pero sobretou gran efectividá.

La segunda parte empezó col Ciares en tromba. Prácticamente na primer xugada, Borja Argüelles comanda l’ataque, regatia a un rival, entra na área, la xugada embarullase pero consigue disparar, el refugue cai-y a Meana qu’a apenes a un metro de la portería pero ensin ángulu, dispara al llateral de la rede. Nueva xugada d’ataque visitante, Borja Argüelles llántase delantre d’Adrián de nuevu, dispara, y cuando se canta’l gol, el porteru realiza una gran espurrida y esvia a córner. Respuende’l Ḷḷenense a la contra: balón que-y cai a May dientro de la área, y el 9 local dispara potente pero con Kike yá batíu atópase col llargueru. Del 0-3 que nun foi al 1-2 que repelió el llargueru.

El Ḷḷenense empieza a llevar enforma peligro, sobremanera a balón paráu y el Ciares paez que da un pasu tras. Nel ’70 Nacho Cabo da entrada a Pablo Martínez por Borja Argüelles, y 5 minuto dempués Rubén Montequín dexa’l so llugar a Pichón, quien remanez tres un mes mancáu. El Ḷḷenense siguía apertando con un xuegu enriáu por Hugo, cada falta yera un balón a la área que la defensa xixonesa sufría pa estenar, pero pel momento solo yera sensación de peligru.  Nel ’75 el Ḷḷenense entra pela banda esquierda, centra l’enésimu balón a la área y el balón cute en Rigo. L’árbitru Barbeira Juste señala mano y por tanto penalti, amosando amás la segunda mariella al defensa. Como yá asocediera na primer parte, la so decisión sospriende a toos porque’l balón cute nel pechu de Rigo. Pablo Sánchez llanza’l penalti y ponlu na escuadra esquierda de Kike. 1-2, un xugador menos, y 15 minutos de sufrimientu per delantre. Por si fora poco Jimmy retírase tocáu, entrando Aitor Cañedo qu’ocupa’l llateral derechu a pierna camudada.

El Ḷḷenense siguía apertando y el mieu na grada yera una realidá. Superáu’l ’80, córner y el remate de Pablo Sánchez va contra’l llargueru. Cuando más tensión alendábase, Hugo avanza col balón na posición d’interior derechu, ve’l desmarque de Pedro Luis, pon un nuevu balón colgáu que remata’l veteranu delanteru, cute llixeramente en Lozano, y cólase na portería de Kike. Final del partíu y sensación de que volaben dos puntos. Sicasí, una vegada reposáu’l partíu, empate merecíu pal Ḷḷenense y bon puntu nun campu complicau que puede ser d’oru ganando al Ḷḷuarca en casa.

Próximu partíu: Domingo 12:30 en La Cruz, U.C. Ceares – Luarca C.F.