[Ciares 0-2 Llangréu] Mazazos inoportunos

El Llangréu marcha colos 3 puntos de la Cruz tres de marcar en dos momentos psicolóxicos del alcuentru.

[youtube]https://www.youtube.com/watch?v=0sGJMLRiRwU[/youtube]

Uno de los tópicos del fútbol, es ese que habla de los goles psicológicos. Dicen los que más saben, que los goles nel minutu 44 manquen más que los encaxaos en cualquier otru momentu. Güei el Ciares sufriólo nes sos carnes, non sólu encaxó nesi fatídicu minutu, sinón que recién empezada la segunda, trestras d’una oportunidá llocal, repetía suerte.

Total, que volaben tres puntos de la Cruz, a pesar de nun dar el Ciares en nengún momentu sensación de ser inferior al so rival.

Pocos cambios, pero reseñables, nel Ciares. Chery volvía al so llateral, y Aitor garraba’l flancu derecha del centru de la defensa. Cris Alonso recuperaba’l so puestu nel 11, y Rubo encargábase de portar el 9, camiseta que dexaba llibre Marcos Alonso al vese suspendíu por acumulación d’amonestaciones.

La primera llegada clara yera pa Natan, controla un balón en llargu, intérnase nel área y cae tres d’un forcexu. Reclamóse penalti dende la grada. La réplica púsola’l Llangréu. Gran xugada pela banda derecha que termina nun mano a mano con Davo que va escontra’l llargueru.

Rubo dispuso de dellos disparos dende dientro l’área, toos ellos yeren rechazados pola defensa. De nuevu Natan yera quien lo intentaba. Gran contra que termina col balón nos sos pies y dispara, roza col defensa y marcha llambiendo la escuadra.

La última llocal teníala Juan Carlos, que xugaba’ so primer partíu como llocal esta temporada. Disparaba dende la frontal del área, col interior, arriba, pero Adrián Torre llucíase y mandábala a córner.

Precisamente tres del córner llocal llegaba’l primer mazazu. A César faltáron-y unes décimes de segundu pa cazar el rechace na frontal. Pablo Acebal salía dende la so banda como un volador, llegába-y el balón, y servíala perfecta a la cabeza de Turzo que remataba picáu a la base del palu izquierdo de Davo.

Na primera xugada de la segunda parte pudo empatar el Ciares. Córner al primer palu que remata Fonso hábilmente buscando la escuadra, pero vase por pocu.

Na siguiente, segundu y definitivu mazazu. Córner a favor del Llangréu. El balón péga-y a Claudio na nariz y desvía la so trayectoria. Davo a puntu ta de salvar pero colábase pa desesperación llocal.

Con 0-2, tuvo un match ball el Llangréu. Davo valtiaba a Luis Nuño y l’árbitru señalaba penalti. Llanzábalu Pablo Acebal, pero-y pegaba un pocu mordía y marchaba al palu.

El penalti falláu daba un pocu de vida al Ciares, pero nun yera’l día. Nun siendo inferiores, nun fueron quien a poner en peligru a portería defendía por Adrián Torre. Cerca tuvieron de metese nel partíu tres d’un disparu de Natan, de nuevu tres d’un gran pase, que rechazaba’l defensa y diba a córner. O Cris Alonso, que recortaba y disparaba durísimu cola zurda pero bloquiaba Torre. O Juan Carlos, que probaba de falta directa pero’l so disparu perdíase xuntu al poste derechu de los de la Cuenca’l Nalón.

Al final, nada se podía facer, y los puntos escapaben de Los Pericones. Tercera derrota consecutiva como llocal, tres d’un comienzu inmaculáu en campu propiu. Agora toca Llugones, na matinal dominical. Toca sumar.