Doble victoria escontra’l Llano 2000 y el Argüero
Dos victories fuera n’apenes 6 hores, sí qu’entamamos fuertes anguaño. La xornada del Sábadu empezó a les 12:00 en Braña Sur col amistosu ante’l Llanu 2000 de Rexonal Preferente.
SD Llano 2000 1-4 UC Ceares
L’once inicial ciarista formaronlu: Kike, Fonsi, Lozano, Rigo, Óscar Ruiz, Meana, Pichón, Borja Argüelles, Pelayo Torre, Jimmy y Rubo.
Tardamos pocu n’adelantranos, daqué menos de 10 minutos, cuando Pelayo Torre disparó cola esquierda dende dientro de la área poniendo’l 0-1. Poco dempués el Llanu2000 empataba a la salida d’un córner, pero Jimmy asonsañaría la xugada darréu pa poner el 1-2 con un remate nel primer palu tres córner d’Óscar Ruiz. N’otru córner llegaría’l 1-3; xugada ensayada qu’acababa con un disparu de Meana dende la frotal que se colaba de plenu pela escuadra roblando un tanto magníficu. El marcador reflexaba’l bon xuegu ciarista, y en cantu del descansu Meana y Jimmy repitíen protagonismu, al sirvir el primeru un pase precisu penriba al llombu de la defensa que’l capitán controlaba fantásticamente y ponía llueñe del algame del porteru. 1-4 al descansu con un gran xuegu y munchos detalles de calidá.
La segunda parte foi menos animada, Martín, Ponte, Galache, Hevia y Jorge Marcos tuvieron minutos, y Nacho Cabo aprovechó pa realizar delles pruebes como Borja Argüelles na media punta o los estremos a pierna camudada. Finalmente’l 1-4 caltúvose nel marcador, con un partíu sobresaliente de los nuesos.
Argüero CF 1-2 UC Ceares
El segundu asaltu llegaba a les 18:00 ante’l Argüero CF de primera Rexonal, nel Troféu Pilar Ordieres enmarcáu nes fiestes locales.
L’alliniación esta vegada foi la formada por: Pablo, Martín, Hevia, Lozano, Jorge Marcos, Pichón, Pablo Martínez, Borja Argüelles, Galache, Fran Dos Santos y Ponte.
El terrén un tanto irregular condicionó’l partíu, amás del cansanciu acumuláu. Pasada la media hora de xuegu, Ponte escapábase en velocidá rompiendo’l fora xuegu nun contraataque, y en llevantando la cabeza pa poneila a Fran Dos Santos, quien intelixentemente dexaba pasar el balón pa que Borja Argüelles controlara con tranquilidá y batiera al porteru llocal. Poco duró’l 0-1; al filu del descansu Pablo trataba de blocar un disparu rasu ensin apenes peligru, sicasí, l’irregular verde xugába-y una mala pasada y cuando paecía qu’atrapara’l balón un mal bote fixo que se-y escapara de les manes pa cae-y a los pies al delanteru local, que marcaba a puerta vacía. 1-1 y xugadores a vestuarios.
La segunda parte entamose col siguiente once: Pablo, Martín, Hevia, Rigo, Jorge Marcos, Meana, Pablo Martínez, Pelayo Torre, Galache, Fran Dos Santos y Ponte.
El xuegu volvióse per embarullau y les ocasiones fueron escases, quedando l’espectáculu na grada cola animación de l’afición ciarista. Siguíen les pruebes y los cambeos: Pelayo Torre, qu’actuó como mediapunta, dexaba’l so llugar a Fonsi, que lo fadría como pivote, y como cambiu natural Rubo sustituyía a Fran Dos Santos. Y precisamente foi Rubo, quien en tiempu de descuentu, aprovechó un gran centru de Jorge Marcos p’adelantrase al so defensor y poner el definitivu 1-2. Partíu igualáu nel qu’el Argüero amosó un xuegu cimeru al que diz la so categoría y que nun nos pusó nada fácil el poder llevantar el Troféu Pilar Ordieres.
Un bon Sábadu de fútbol que vuelve confirmar les bones sensaciones que ta dexando l’equipu.
Próximu partíu: Miércoles a les 19:30 en La Cruz escontra’l Atlético de Lugones.