Entama lo bono: Urraca C.F. – U.C. Ceares

Cola victoria del miércoles ante’l Manuel Rubio por dos goles a trés acabaron les pruebes de pretemporada. Llueñe queden yá los perduros primeros díes d’entrenamientos, el Troféu Pepe Ortiz, el Memorial Giovanni… Empieza la Lliga y tres una pretemporada intensa, con munches más lluces que solombres, el nuesu equipu va cruciar el Principáu escontra l’oriente pa visitar a unu de los conxuntos que meyor reforzáronse: l’Urraca C.F.

Pa esti partíu son baxa segura Borja Noval, y Fonsi, qu’acarreta sanción de la temporada pasada. Amás, futbolistes como Fran o Óscar van ser dulda hasta última hora. Los aficionaos ciaristes que se muevan a Posada (en fiestes esta fin de selmana) van tener ocasión de ver debutar en Lliga a bastantes de los nuevos futbolistes como Aitor Cañedo (procedente del Llangréu), Rigo (del Cuideiru) o Pichón (que llega del L.luarca).

Si bastantes cares nueves vamos ver los cearistas nel verde de La Corredoria, nun van ser menos les que presenten los llocales. El conxuntu qu’entrena Luis Arturo reforzóse con xugadores d’enforma caláu na categoría y, a priori, van aspirar a ser una de les revelaciones del campeonatu. Homes como Joni (delanteru que raspió la ventena de goles nel Tiuya l’añu pasáu), Arroyabe (ex del L.luarca) o José Luis (futbolista con esperiencia en categoríes cimeres n’equipos como Uviéu o Caudal) xuniéronse al proyectu llaniscu col fin d’engarrar por cotes más altes que la campaña pasada.

L’añu pasáu, na nuesa visita al campu de La Corredoria y magar adelantranos dos veces (primeru Vázquez fixo’l 0-1 y Jimmy en cantu del final el 1-2), un gol de Gusi nel novenu minutu del descuentu fixo volver con menos de lo merecío pa Xixón.

L’alcuentru va ser dirixíu pol colexáu Peláez Fernández, de la Delegación del Nalón. Recordamos que’l balón va rodar el domingu a partir de les 18:30 y que pa tou aquel cearista que quiera movese a Posada, la entrada va ser de 10€ si primeramente apúntase en La Cruz.

A empezar bien la temporada, ¡PUXA CIARES!