Análisis en colloráu y azul: xornada 24
![La afición del Ceares en Lugones](https://www.ucceares.com/wp-admin/admin-ajax.php?action=kernel&p=image&src=%7B%22file%22%3A%22wp-content%2Fuploads%2F2014%2F02%2Flugones_ceares_13-14_15.jpg%22%2C%22thumbnail%22%3A%22%2C%22%7D&hash=2550e8b6)
Enfrentamientos directos, tantu penriba como pembaxo, estruyeron la clasificación de Tercera nuna Xornada vital pa dellos equipos.
![La afición del Ceares en Lugones](https://www.ucceares.com/wp-content/uploads/2014/02/lugones_ceares_13-14_15-590x393.jpg)
La derrota del Llangréu, esmolecedor al ser la tercera consecutiva, ante un rival que llega triando fuerte, lleva al Cuadonga a postulase como unu de los grandes aspirantes al Play-Off. Llegaba’l Llangréu con 9 puntos de ventaya sobre los uvieinos, pero la so derrota por 2-0 asítialos a 6 puntos del play-off. El Llangréu pela so parte dexa’l lideralgu en favor del Llealtá, que visita esta selmana La Cruz nun partíu consideráu grande.
Condal y Ciares llograron sumar un puntu cada unu, pero con distintu valor. El Condal recibía al colista, el L.luarca, y nun pudo pasar del empate a pesar d’adelantrase. El Ceares pela so parte arrincaba un positivu nun campu bien difícil con un rival a l’alza, el Llugones, que pudieron ser 3 d’atinar en dalguna de les sos ocasiones nos primeros 45′.
Llealtá y Pravianu son agora los dos primeros clasificaos na tabla, en resolviendo con victoria los sos alcuentros. Sicasí, paez que yá nun hai 5 equipos pa 4 puestos, paecen ser agora 7. Universidá y Cuadonga a namás 6 puntos de Llangréu, Condal y Ciares apierten, y enforma.
Pembaxo, Andés (con recién cambéu d’entrenador), L.luarca y Tapia, paecen llueñe del puestu de salvación, que nesti momentu marca el Candás. Sicasí, el puestu na tabla de Segunda B del Caudal lleva los nervios a equipos como’l mesmu Candás, Xixón Industrial, o L.lenizu, que s’empeñó en metese embaxo na tabla. Inclusive l’Urraca tien problemes a pesar d’iguar un gran equipu esti branu.
No que al Ciares refierse, duros enfrentamientos estes próximes dos xornaes. El sábadu reciben al líder, el Llealtá, pa viaxar darréu a Noreña y enfrentase al Condal, cuartu clasificáu. Dos piedres de toque pa midir l’estáu del equipu que tantes allegríes ta faciendo pasar a los aficionaos teyeros esta temporada.