[Previa Andés] Muncho que ganar
Encaramos les 10 últimes xornaes con muncho que ganar. Tamos en puestu de play-off, a namás dos puntos del líder, y con un calendariu, a priori, favorable. Llueñe queda’l primer oxetivu, la salvación, y va tiempu tamién sentenciamos la nuesa presencia na próxima edición de la Copa Federación. Toca’l siguiente pasu: xugar play-off.
El primer tramu d’esti últimu recuestu de la temporada llévanos a xugar frente al Andés. L’equipu de Navia llega en puestu de descensu, pero entá con posibilidaes de salir de baxo, seis puntos dixébrenlu del Candás.
La nota interesada de la xornada ponla la visita de la TPA por cuenta de la ellaboración d’un minireportaxe avera del club y el por qué del gran ambiente en La Cruz.
Yá dende principiu de temporada yera sabíu qu’el Andés sería un peligrosu equipu nel so propiu campu. Ello ye que los 18 puntos qu’afaten la so clasificación llográronlos como local. Datu destacáu que nun fueren capaces de sumar puntu como visitante.
Caun de los equipos va tratar de facer el so xuegu. El Ciares, dominador, y el Andés, cerráu tras y buscando salir rápido. Pa consolidar esi dominiu, la directiva teyera fixo un esfuerzu por curiar especialmente’l verde de la cruz. El campu va amosar una de les sos meyores versiones, con un estáu espectacular.
El partíu tien tantu pronósticu local que realmente fai llamar al precuru. Ello ye que el partíu d’ida yá foi un partíu complicáu pa los brickers, que llograron sumar un puntu tres golazu de Pablo Martínez, xugando con unu más.
L’equipu precisa a l’afición esta selmana. Precisámosvos na Cruz.