[Ciares 1-1 L’Entregu] Cruel descuentu
L´Entregu suma un puntu gracies al gol llográu cuando’l partíu yá amorrentaba. Duru empate pal Ciares, que yá vía la victoria nel bolsu.
Primaveral tarde na Cruz. Gran entrada. El Ciares, respondiendo a les mires, L’Entregu, con más calidá que puntos, y con casi un 25% del so 11 titular formáu por antiguos xugadores locales. Qué más se podía pidir.
Ciares 1 – 1 L’Entregu
Ciares: Kike, Fonso, Lozano, Beni, Aitor, Prendes, Juan Carlos, Bryan (Rigo 58′), Pablo Martínez (Chipi 90′), Cris (Chery 73′), Ponte
L’Entregu: Pablo, Álex, Río, Borja Noval, Río, Guille, Isaac (Amine 20′), San Eloy, Borja Argüelles (Diego 71′), Vallina, Marcos, Omar
Goles: 1-0: Cris 35′ 1-1: Marcos 93′
Árbitru: González Suárez, del Colexu d’Avilés. Amonestó a los visitantes Guille, Río, Vallina y Héctor.
Incidencies: 400 espectadores nel Campu La Cruz. Terren de xuegu en perfeutes condiciones. Primero del alcuentru los ex-ciaristas Borja Noval y Borja Argüelles recibieron los premios a máximu goliador y meyor xugador del la temporada pasada.
Borja Argüelles, l’ex 7 del Ciares, recibía’l premiu al meyor xugador. Borja Noval, l’ex 11, faía lo propio col de máximu goliador. Amigos, pero mientres dos hores a escaecese d’ello y a polos 3 puntos.
El Ciares sabe de fútbol. Mientres los primeres 15 minutos los visitantes namás tocaben el balón pa estenalu a campu teyeru. Balón y ocasiones locales. Teníala Ponte, pero Pablo salió rápido y tapó la internada, vuelve caye-y el refugue pero nun pudo contactar con Prendes que triaba solu’l puntu de penalti. Lléga-y el balón a Cris, pero la so cabezada va-y a les manos de Pablo.
Ponte de cabeza volvió complicar les coses al conxuntu de la Cuenca del Nalón. Y Juan Carlos ponía a prueba a la meta visitante con un zurdazu nel picu de la área qu’espeyaba Pablo con problemes.
La entrada de Amine sustituyendo a un mancáu Isaac coincidía colos meyores minutos visitantes. Pero non pol so fútbol, sinón por saber controlar meyor a los brickers. El partíu entraba nun inpass, un pautu de non agresión. Pero surdía la figura de Juan Carlos, enorme pase que dexaba solu nel unu pa unu a Cris, que definía embaxo a la perfección.
La segunda parte yera distinta. L´Entregu quería demostrar que nun viniera de paséu a La Cruz. Apoderaben el balón, queríen xugar, pero nun yeren capaces de triar la área.
Rigo entraba al campu sustituyendo a Bryan, replantegando l’equipu. Fonso adelantraba la so posición, y la so velocidá a puntu tuvo de dar un plasmu a los visitantes. L’Entregu siguía col balón, pero ensin crear peligru. San Eloy disparaba alto como única xugada reseñable. La más peligrosa de la segunda parte teníala otra vegada Ponte, qu’intentaba la vaselina de primeres tres el pase penriba de Lozano. Sicasí, el balón pegaba nel llargueru en botando enforma. Xugada d’intriga con final poco peliculeru.
Llegaba l’últimu minutu del descuentu. Paecía que L´Entregu díbase a dir ensin puntos, sinón tamién ensin disparar ente palos. Pero un centru dende la derecha cai-y a Borja Noval, que la engabita taragañada, pero llega-y a Marcos.
Y un berru afogáu retumbó na Cruz.