[Industrial 0-1 Ciares] Ciares rules
Yera sabíu de mano que’l campu nun taría bien. Muncha agua esa nueche y esa mañana. Pero entrar en Santa Cruz y ver l’estáu del verde foi un mazazu. El balón nun corría, yera imposible xugar ende. Les comparances cola Veigona fai 2 años yeren inevitables, y fízoles más d’unu. Pal árbitru, sicasí, nun había problema. Podía xugase, diba xugase.
[youtube]https://www.youtube.com/watch?v=7h-gzue-kdY[/youtube]
La baxa de Prendes modificaba’l centru’l campu, con Jorge Vázquez y Juan Carlos como dobles pivotes, y Jimmy actuando d’enllace. Bryan y Chery calteníen la titularidá, y Ponte era’l 9 de referencia.
Indus 0 – 1 Ciares
Indus: Roberto; Pablo Torres, Charly, Queipo, Álex; Borja, Dani alcalde (Jorge 81′); Jony (Pelayo 59′), Víctor Robles, Natan (Abdou 71′); y Javi Manín
Ceares: Kike; Rigo, Lozano, Beni, Aitor; Jorge, Juan Carlos; Bryan (Piñera 76′), Jimmy (Polo 57′), Chery (Cris Alonso); y Ponte
Goles: 0-1: Polo 95′
Árbitru: Fernández Buergo. Mostró tarxeta mariella a Charly dos vegaes (45′ y 70′), pol Xixón Industrial; y a Rigo (44′) y Jorge (66′) pol UC Ceares.
Incidencies: Alcuentru correspondiente a la xoranda 16ª de la Tercer División asturiana. Partíu disputáu nel campu Santa Cruz. Terren de xuegu enllamorgáu.
Empezaba meyor el Indus, y Kike salvaba a los visitantes en dos vegaes. Una d’elles espectacular, al tapar un unu escontra unu de Javi Manín. Los fabriles acopláronse meyor al campu y rondaben la portería local. La defensa ciarista sicasí nun concedía ocasiones. El partíu xugábase en campu visitante, pero naide creaba. La llínea de retaguardia del Ciares sobrábase.
Pocos acercamientos nesta primer parte pa los ciaristas. Lo meyor, una falta que llanzaba Aitor dende bona posición pero salía esviada.
Ensin más hestoria llegábase al descansu. Meyor los locales, pero resultáu xustu. El campu nun convidaba a practicar meyor xuegu.
Salíen meyor los visitantes na segunda metá. Adelantraben llínees, y el partíu empezó a xugase en campu local. Llueu tuvo Jimmy la primera. Bon pase de Ponte, pero cuando Jimmy diba engatillala, el balón quedábase-y muertu nun charcu. Rectificó pa disparar col esterior, pero tapaba’l defensa.
Intentábalo tamién Juan Carlos de falta direuta, pero’l so disparu yera refugáu pola barrera. Pero la meyor ocasión diba tenela Bryan. Gran xugada de too l’equipu n’ataque. El balón lléga-y por altu a Bryan en posición de disparu pero’l so tiru de tiesta vase esviáu.
Cuando el Indus quedábase con 10 por espulsión, bien aldericada nes graderíes, de Charly, la victoria visitante paecía cerca. Sicasí, la entrada de Abdou caltuvo a los locales seles.
Amorrentaba’l partíu, minutu 95. Saca Aitor de banda y busca a Beni. Beni saca tola potencia pa dise de dos nel llateral de la área. Centra cola maniega y Polo ponla de cabeza al otru palu.
Si entá nun vistis el vídeu, táis tardando.