[Ciares 0-0 Universidá] De tolos collores
El Ciares nun llogra ver puerta a pesar de disponer d’infinidá d’ocasiones nel so duelu col Universidá d’Uviéu.
[youtube]http://youtu.be/DV2GakZ9mP4[/youtube]
Llegaba mancáu’l Ceares al partíu col Universidá d’Uviéu. La recién derrota en Noreña metía presión al equipu, y los 3 puntos en xuegu podíen considerase como importantes. La baxa de Jorge Vázquez, xunida a la de Prendes, provocaba un movimientu de pieces nel centru campu que llevaba a Aitor Cañedo a acompañar a Juan Carlos na medular. La baxa por sanción de Fonso cubríala Berto na so posición natural.
Ciares 0 – 1 Universidá
Ciares: Kike, Berto, Lozano, Beni, Chery (Bryan 61′), Aitor (Polo 67′), Juan Carlos, Pablo Martínez, Jimmy, Cris Alonso (Chipi 73′), Jimmy
Universidá: Carlos, Pedro, Ramón, Fuentes, Enrique, Rute (Luis 61′), Cali, Colubi, Jaime (Juan 53′), Zurdi, Jorge
Árbitru: Delgado Fernández, del Colexu d’Avilés. Expulsó por collorada direuta a Berto Vallina
Incidencies: Partíu correspondiente a la xornada de fuelga de los clubes asturianos. 250 espectadores nel Campu La Cruz. Terren de xuegu blandu a causa la agua de los postreros díes.
Empezaben fuerte los brickers. Na primera parte les llegaes a la área del fondu sur de la Cruz yeren constantes. Nel primer minutu yá sacaba’l primer córner.
Ponte tenía la primer clara. Internábase na área dende banda esquierda, retayaba, y con tou a favor pegába-y mal al balón.
Vuelve repitila, guapu retayu pa escontra fora. Dexa pa Jimmy que llega de cara pero’l disparu del capitán refúgalu’l porteru.
El repertoriu d’ocasiones clares na primer metá ciérralu Ponte de nuevu. Gran centru con pierna esquierda de Cris Alonso, l’ariete xixonés remataba de cabeza pero salía-y demasiao centrada. Otra internada de Cris terminaba con disparu de Pablo Martínez fuera.
Al descansu paecía increíble que nun hubiera goles pa los locales. Empezábase la segunda parte con cambéu de dibuxu. Aitor volvía al so puestu habitual, Chery al estremu, Cris a la derecha, y Pablo Martínez a combinar nel centru del campu. La primera yera precisamente pa Pablo, disparaba duru embaxo, pero’l so disparu diba llambiéndo’l poste.
Los minutos diben pasando, y los nervios aumentaben tantu na grada como nel campu. La mancadura d’Aitor favoreció un nuevu cambéu d’estratexa pa Miguelín, qu’introducía a Polu nel so llugar y pasaba a defensa de 3.
La llocura llegó a falta de 15 minutos. Na primer llegada visitante a la área teyera, Berto refugaba’l balón cola mano en llínea de meta y el colexáu señalaba penalti, y amosaba cartón coloráu pal llateral. El penalti diba llanzase a lo Panenka, pero Kike nun cayía nel engañu y blocaba.
Darréu tener Jimmy, pero’l porteru visitante volaba a la escuadra y mandábala a córner. L’equipu vió la lluz cuando l’árbitru señaló penalti por una nueva mano. De nuevu Juan Carlos tenía la ocasión, disparaba embaxo pero díbase-y esviada. Manos a la cabeza.
Con 10 xugadores el Ciares trataba d’apoderar y el Uni de contraatacar. Podía pasar de too. La clara teníala Ponte, con un nuevu mano a mano, pero salvaba la defensa universitaria en llínea de gol.
El sábadu sigue la guerra. Llega l’Urraca.