El fútbol femenín llega a La Cruz

Esti domingu va marcar un finxu na hestoria reciénte del nuesu club, yá que por primer vegada un equipu femenín venceyáu al U.C. Ceares, va saltar a La Cruz como llocal representando a la ciudá y al barriu.

Esti ye un de los primeros frutos de la fusión deportiva aprobada polos socios n’asamblea y qu’integra al fútbol base del U.C. Ceares y del Gijón Fútbol Femenino dientro d’una mesma estructura, la Escuela Mista de Fútbol.

Queremos animar a tola masa social del club, que dende l’entamu d’esta nueva etapa demandó que s’emprestara atención al fútbol femenín, a que de la bienvenida a les nueses compañeres del Gijón F.F. a la so nueva casa, y a que contribuya a que La Cruz presente esi ambiente de fútbol que la caracteriza, demostrando una vegada más que’l fútbol ye de toes y toos.

La entrada ye gratuita, asina que nun duldar en convidar a toles persones de la vuesa redolada pa qu’esti domingu La Cruz seya una fiesta del fútbol una vegada más.

Tol ciarismu tenemos una cita ineludible…

¡PUXA CIARES! ¡PUXA XIXÓN!