[Industrial 2-0 Ciares] Sicasí

Cae’l Ciares ente un Industrial superior nun partíu duru marcáu por un práu llentu al que se supieron adaptar munchu meyor los fabriles.

Nengún de los dos equipos llegaba en buena dinámica, anque’l Ciares acababa de superar una mala racha goliando al Astur a domiciliu.

Pela so parte, l’Industrial lleva tola temporada na cola de la clasificación, dando lluz como “farolíllo rojo”, y encaxando una goliada dura col Caudal la xornada pasada.

Y por embargu,
L’Industrial foi meyor que’l Ciares, supo adaptase meyor al llentu y pesáu terrén de xuegu, y se fizo acreedor a la victoria.

Iñaki Eraña nun podía repetir l’once que na xornada anterior arrasara nel Hermanos Llana. La baxa de Fonso debilitaba entovía más la defensa colorada, que ya sufre la de Beni, al que-y queden dos partíos. Chus Naves, enfermu, cedía´l puestu a Cris, que volvía tres d’una sanción.

Y con too,
L’once inicial yera de garantíes. Miguel ya fuera de los destacaos n’Uviéu, Dani Hevia, volvía al llateral, el so puestu natural, Pablo Martínez a la banda, y Juan Carlos a los mandos.

El Frontón nun ye’l meyor de los praos pa disfrutar del fútbol nestos díes asturianos. Nun hai un abellugu nel que guarecese cuando la lluvia arrecia, noventa minutos de pies baxu l’agua nun ye’l meyor de los planes pa un domingu d’iviernu.

Sicasí,
L’afición del Ciares nun falló a la cita. Cruzó Xixón, y se plantó nel Frontón sin parar d’alentar al so equipu durante esos noventa minutos, al empiezu, al final, cuando s’esperaba la victoria y cuando se sabía la derrota, antes del pitíu inicial y dempués.

Del partíu qué decir. L’Industrial foi meyor. Ciertu ye que’l partíu tuvo mui igualáu. Poques ocasiones, pero toes llocales. Na primer parte malpenes hubo, solu una, y foi llocal, y foi gol. Indecisión na defensa, que dexa solu a Carlos Pajín y batía per baxo a Davo.

Del Ciares poco, un únicu avisu, estratexa nel córner llanzáu por Pablo Martínez que remataba duro Rubo nel puntu de penalti, pero’l balón diba a córner otra vez. La mala noticia llegaba mediada la primer metá, cuando un Aitor Cañedo mancáu dexaba´l so puestu a Hugo. Acumulábense los problemes na retaguardia.

Llegábase al descansu abaxu nel marcador, con problemes pa crear ocasiones, pa xugar. L’equipu ta confeccionáu pa xugar per baxo, pero nun dexaba’l prau. Serios problemes polo tantu. Pero na segunda parte empezábase de cero. Yá la temporada pasada, nun prau estrozáu, algamárase ganar lluchando los noventa minutos.

A pesar de too,
El gol al principiu de la segunda parte, tres d’una gran xugada con testarazu final d’Álvaro, mataba casi’l partíu y mataba al Ciares. El resultáu yera demasiáu duru, y poques veces dio la sensación de poder inquietar a Roberto. L’agua nun paraba y el prau resentíase cada vez más.

De fechu, les ocasiones siguíen siendo llocales. Un mano a mano con Davo marchaba raspiando’l palu. El propiu Davo llucíase salvando un disparu duru arriba. Inclusu se gustaba picando dos vegaes el balón pa salvar al delanteru y salvar la posesión con clase.

Pero,
A pesar de la dureza del partíu y de lo decantáu del marcador, el Ciares nun-y perdió la cara al partíu. Los últimos minutos pasólos nel área llocal, buscando’l gol. Ehí foi onde llegaron los meyores minutos visitantes, cuando se volcaron. Álvaro Ponte tuvo la más clara. Amás foi la meyor noticia de la tarde, al volver al terrén de xuegu dempués de munches xornaes nel dique secu.

Pa l’afición ciarista nun foi la meyor xornada. Perdieron el derbi y l’equipu nun tuvo bien.

Nostante,
Nun cesaron de cantar. Y se preparen pa volver a facelo’l prósimu domingu, cuando repitan derbi, nesti casu col tamién necesitáu TSK Roces.