[Siero 0-1 Ciares] El Ciares tómalo en Siero
Les dimensiones y la superficie d’El Bayu beneficiaron a los futbolistes más creativos del equipu d’Eraña, que por fin llogró ganar.
Repetía arriba la pareya que ficiere estragos durante la primer parte la temporada, Álvaro Ponte y Marcos Iglesias, Marcos Iglesias y Álvaro Ponte, y faenlo con una victoria n’El Bayu que da aire a los visitantes, y-yos lu resta a los llocales.
Siero 0 – 1 Ciares
Siero: Kike; Bruno (Bruno Alves 46′), Adolfo, Trubi, Patón; Herrero, Abel; Borja Arguelles, Edu Losa (Yeray 56′), Osky (Río 60′) y Saha
Ciares: Davo; Fonso, Miguel, Aitor Cañedo, Chery (Hugo 78′); Natan (Dani Hevia 64′), César, Pablo Martínez, Cris; Marcos Iglesias (Chus Naves 71′) y Ponte
Goles:
0-1: Marcos Iglesias 24′
Árbitru: Álvarez Lana (Uviéu). Amonestó pol Siero a Trubi y Yeray y espulsó por mariells doble a Herrero. Pol Ciares amosó marielles a Marcos Iglesias, Ponte, Aitor Cañedo y Fonso.
Incidencies: Alcuentru correspondiente a la vixésimu sesta xornada de la Tercera División n’Asturies celebráu en El Bayu ente unos 250 espectadores, munchos d’ellos ciaristes. Prau artificial.
El campu sierense adáptase a la perfección a la maquinaria teyera. Terrenu de xuegu grande, y superficie artificial. Xusto lo que necesiten Pablo Martínez y César pa combinar ente ellos y facer rodar el balón. Peles bandes, Natan y Cris busquen la verticalidá y los centros pa la pareya d’arietes.
La primer parte tuvo claru color celeste, color que llucíen ayeri los del Parque los Pericones. Munchu dominiu de balón, posesión, y control del xuegu. Enfrente, los llocales, optaron pol xuegu vertical buscando a Saha, pero topó con un impecable Aitor Cañedo nel marcaxe, que consiguió minimizar los daños que l’espigáu delanteru africanu suel causar nes zagues.
La primer ocasión llegó nun disparu de César dende dientro l’área, pero-y salió mui centráu y atrapaba Kike, vieyu conocíu de la portería teyera. L’otru conocíu, y añoráu, ye Borja Argüelles, lluciendo’l so clásicu 7 na camiseta. Na siguiente xugada llegaba’l gol, al marcar Marcos Iglesias un penalti claru cometíu sobre él mesmu. El disparu, duru y perbaxo, imparable.
La segunda metá disputóse a “tumbabierta”. Los brickers buscaron el gol con transiciones rápides, con un Cris Alonso que desquició a la defensa llocal. Na so primer internada yera refugáu el centru per baxo.
La primera clara foi pa Marcos Iglesias, que dió con un balón muertu nel área, solu. Controló, y cruzó’l balón, pero-y pegó algo mordío y marchó per centímetros. Ponte tuvo la segunda, tres d’una dexada de Marcos de tiesta, pero nun algamaba batir a Kike nel mano a mano.
Davo salvaba al Ciares nun doble remate de Saha, nos minutos nos que más emburrió’l Siero, anque lo ficieran siempre cola mesma fórmula, balón vertical buscando la cabeza de Saha y la segunda xugada.
Mui clara tamién pa Marcos Iglesias. Robaba’l balón en posición del llateral zurdu, internábase nel área, encaraba a Kike, ponía pausa, pero inesperadamente disparaba al llateral zurdu cuando se cantaba’l gol. Amás, na mesma xugada’l 9 xixonés caía mancáu, y yera sustituyíu por Chus Naves.
Xugada clave sólo 5 minutos dempués, cuando los llocales reclamaben un penalti con vehemencia, lo que llevó a la espulsión d’Herrero por protestar. Queden menos de 20 minutos, pero’l Siero quedaba mui tocáu.
Tampoco-y perdieron la cara al partíu, y pese a la inferioridá numbérica nun entregaron el partíu. Nun ayudaba’l Ciares, que nun acababa de sentenciar. Un mal disparu d’Álvaro Ponte tres d’una dexada de Cris, y sobre too, una gran xugada del estremu xixonés, que lu plantaba ente Kike, pero salvaba otra vez el guardameta llocal.
Esa xugada llegaba nel minutu 95. Paecía too’l pescao vendío. Pero otru balón colgáu terminaba nel segundu palu. El remate de cabeza diba a les manos de Davo. Agora sí, final.
El domingu va visitanos el Caudal, líder de la categoría, y con una plantiya de munchos quilates, buscará dar otru pasu escontra’l campeonatu. El Ciares, dar otru pal so oxetivu, la Copa Federación.