La escuela abarca dende la categoría de Pro-Futbol, onde munches neñes y neños tienen la primer toma de contactu col deporte, hasta la categoría d’Infantil. Tres d’ella entama a orientase’l trabayu a la preparación de xugadores pa competir colos primeros equipos del U.C. Ciares y del Xixón Fútbol Femenín, que ye otru de los oxetivos fundamentales del fútbol base.

Consideramos que pa’l desarrollu del proyecto de la escuela ye imprescindible qu’haiga neñes y neños, mocedá, vecines y vecinos, families, etc. que s’identifiquen con él y lu sientan como suyu. Son ellos y elles quienes tienen de garantizar la so pervivencia: siendo técnicos y tecniques, directives, collaboradores y desendolcando llabores n’ambos clubes y la escuela.

El fútbol tien un gran potencial y ye un vehículu de valores. Dende la EMF queremos fomentar la responsabilidá, la cooperación, el compañerismu, l’esfuerzu, el respetu, y refugar, con más firmeza de la que ye habitual nel mundu del fútbol, el racismu, la homofobia y especialmente el sexismu, que tanto llastra a la consideración de les muyeres como deportistes y futbolistes.

El nuestru oxetivu ye tabién enseñar fútbol, coles sos cuestiones técniques y estratéxiques, ayudando a la reciella y la mocedá a desarrollar el so potencial y propiciar que’l fútbol siga acompañándolos y acompañándoles d’adultes, seya cual seya’l nivel competitivu qu’algamen.

Estos motivos son los que propiciaron la collaboración ente los clubes y la creación d’esta Escuela Mista de Fútbol.