[Sporting B 7-0 Ciares] El Ciares sal amayucáu de Mareo

Dempués de dos enfrentamientos na copa federación, saldaos con sendes victories pela mínima a favor del Sporting, llegaba la hora de la verdá: La lliga ye otra cosa.

Primer xornada que volvía a poner, frente a frente, a Sporting B y Ciares nun alcuentru, el resultáu déxalo bien a les clares, en que el filial sportinguista atopó poca oposición por parte del rival, ye más, los errores defensivos del Ciares, impropios d’un equipu de Tercera, facilitaron les coses a los roxiblancos. Más difícil de comprender si los equipos qu’entrena Tino del Corzo, debutante nel bancu, al igual que José Alberto nos roxiblancos; construyíos d’atrás alantre, caracterícense pola so fortaleza defensiva.

Nel minutu cuatro del alcuentru empezó a xestase’l desbaraxuste teyeru. Sanabria mete al área un balón sin peligru aparente, con tola ventaya pal defensor, concretamente Chery, pero entretiénse n’escesu a la hora de sacalu y facilita la llegada d’ Isma Cerro, quien queda col esféricu pa mandalu, axustáu, a la derecha de Davo. Yera’l 1-0.

Sin duda qu’un resultáu adversu tan pronto, y la forma en qu’ésti foi conseguíu, descompuso a los ciaristes quienes ya nun consiguieron enganchase al partíu. A los nueve minutos un balón dende la derecha ye controláu nel interior del área, primer palu, por Jaime Santos, el so primer disparu, con tola portería ye repelíu pol llargueru, pero’l propiu xugador aprovecha’l rechace pa, de cabeza, anotar el segundu pa los llocales.

Intentó’l Ciares acortar diferencies, fueron minutos nos que los pupilos de Tino, a balón paráu, trataron de llegar con peligru. Y nuna d’eses xugaes d’estratexa, córner dende la derecha que pon Cayarga, primer palu, Marcos Iglesias qu’agacha la tiesta intentado’l remate recibe un golpe na mesma d’un defensor ensin que’l colexáu aprecie nada punible. Mala suerte pa l’ariete ciarista quien amás de nun obtener rédito pa l’equipu acabaría resintiéndose y abandonando’l terrenu de xuegu un cuartu d’hora más tarde.

Anque antes tuvo tiempu de protagonizar otra xugada importante al aprovechar un balón en profundidá y dir al suelu ente la salida del guardameta Dani, quien, según criteriu de Barbeira Juste; arrolla al atacante, polo que nun dulda en señalar penalti. De la execución encárgase’l propiu Marcos, balón rasu, a la izquierda, qu’acaba pegando nel poste antes de volver al terrenu de xuegu pa ser sacáu pola defensa. Anteriormente ya’l Sporting tenía anotáu el terceru, el so autor Jaime Santos de cabeza.

Una buena combinación llocal, y pasividá defensiva ciarista, con balón que Pedro Díaz mete al área pa Jaime Santos, quien tien tiempu de mirar y poner a la cabeza pa Claudio. Lo que permitió al Pichichi de la temporada pasada anotar el primeru na so cuenta particular y cuartu pa los suyos. Resultáu col que se diba llegar al descansu.

Foi’l punta ciarista Javi, sustitutu de Marcos Iglesias, y con pasáu sportinguista, el xugador más motiváu tres de la reanudación, con dos ocasiones de gol, pero-y faltó fortuna nel desenllaz final. El Sporting paecía nun querer profundizar más na fería y dexábase llevar, hasta que llegaron los cambios y los homes de refrescu paecíen querer aprovechar la oportunidá pa pone-y les coses difíciles a José Alberto a la hora de faer les alliniaciones. Claudio anotaba’l quintu, Nacho Méndez en xugada personal pela derecha y disparu envenenáu, buscando’l palu llargu nel sestu, y pesllaba la cuenta Cayarga con un llanzamientu dende la frontal, de vaselina, que tres de pegar nel llargueru acababa nel fonuo de la portería.

Victoria incontestable del cuadru llocal que seguramente dexarálu como llíder tres d’esta primer xornada, el Ciares va ser colista; de toes formes nun foi más que’l primer alcuentru de lliga y ye pronto pa sacar conclusiones, queda toa una temporada per delantre.