[Xixón F.F. 1-4 El Olivo] Segundes partes enxamás foren bones

El Olivo marcha colos tres puntos de Xixón tres d’un partíu estrañu con una parte pa cada conxuntu.

El partíu comenzaba con un intercambeu d’acercamientos al área ente los dos conxuntos, pero ensin llevar realmente peligru, hasta que nel minutu 20 tres d’un saque de portería de Lorena, Carla se planta sola ente Iria Pazo, a la qu’intenta batir de vaselina, pero’l disparo sal-y demasiáu baxu a les manes de la portera gallega.

Tamién Aida diba intentalo de vaselina nel minutu 18 de partíu n’otra buena ocasión llocal. Pero diba ser Lydia la que abría’l marcador tres d’un saque de falta intelixente per parte de Zara contra’l corner derechu del ataque xixonés, onde tres recortar la salida de la portera, finaliza raso con pocu ángulu. Un a cero y por fín el dominiu de los últimos minutos obtenía recompensa. Reaccionó El Olivo al gol encaxáu creando un par d’averamientos con relativu peligru colos que se dio pasu al tiempu de descansu.

Dende’l principiu de la segunda parte yá se podía intuir que la historia diba ser diferente. Al poco de comenzar, Natalia De Francisco metía’l miéu nel cuerpu a l’afición llocal con una ocasión clarísma, entamando un periodu d’ocasiones sucesives desbarataes por una Lore acertadísima, que realizó delles intervenciones de gran méritu.

Sicasí l’acosu visitante acabaría teniendo premiu nuna xugada na qumun tiru rasu pel palu curtiu pasa pente delles xugadores, despista a Lorena que nun puede bloquiar y el balón introduzse na portería llocal. Pudo cambiar el partíu si tres del saque de centru Iria Pazo nun tuviera fecho otra gran salida arrebatándo-y el balón a Paula nel un contra un, pero foi la guardameta la que ganó la partida nesta ocasión.

Dolió muncho esi gol y la ocasión fallada, y coles xixoneses tovía noquiaes, Irina Martínez ponía l’un a dos. Siguía la cuesta abaxu del equipu llocal que nun acababa de recuperase. Cuando paecía qu’empezaben a desfacese del agobiu vigués disponiendo d’alguna llegada, como un remate de Tifi que marchaba pela izquierda de la meta gallega, les visitantes aprovecharíen un mal despexe de la zaga asturiana pa facese con un balón cerca del borde izquierdu del área que Mónica Rodríguez, qu’acababa de incorporase al alcuentru diba apenes unos minutos, aprovechaba pa batir a Lore con una imponente vaselina qu’entró pegada al palu izquierdu.

A partir d’ehí, intentu de reacción per parte del Xixón Fútbol Femenín con diversos balones que se pasearon pel área rival ensin alcontrar rematadora, hasta que nuna xugada desgraciada Mayra intentaba despexar introduciendo’l balón na so propia porteria poniendo’l 1-4 definitivu nel marcador. Tábemos casi al final del tiempu reglamentariu y nun había tiempu pa más.

Demasiáu castigu pa lo que se vio en prau, y buena primer parte de les xixoneses que se vio escurecida pola tormenta desatada por El Olivo nel segundu tiempu. Prósima cita, tou un clásicu, visitamos al Uviéu Modernu.