[Ciares 1-0 Llanera] Marcos Iglesias executa
Un gol solitariu del ariete xixonés valió pa batir al Llanera nun alcuentru desaboríu y siguir esguilando puestos.
https://youtu.be/hvkcBv7AawQ
La Cruz rindió un homenaxe sentíu a Héctor, un sociu mozu recientemente fallecíu.
Diametralmente distintu’l partíu de Llanera col disputáu la selmana pasada n’El Sotón. Si 7 díes enantes, pasaben munches coses nos 90 minutos, quizás más de les necesaries pa un Ciares que controlaba’l partíu, güei disputábase un partíu trabáu, ensin ocasiones, y con munchu control nel centru’l prau.
Los estremos titulares en L.lena, Cayarga y Cris, quedaben nel banquín. Sorprendía sobre too lo de Jorge Cayarga, que fuera indiscutible hasta entós na banda zurda. Entraben Guille Barquero, que disputó mui buenos minutos nel últimu alcuentru, y Javi Gutiérrez, qu’acompañaría a Marcos en punta. Tamién Hugo yera novedá, formando nel centru de la zaga xunto con Beni.
U.C. Ciares 1 – 0 U.D. Llanera
Ciares: Davo, Fonso, Hugo, Beni, Chery, Juan Carlos, Dani Peláez, Pablo Martínez (Cris 69′), Guille Barquero (Cayarga 65′), Javi Gutiérrez, Marcos Iglesias (Iván Suárez 85′)
Llanera: Gabri, Javi, Ángel, Esteban, David, Pablo, Cris (Chema 77′), Aitor, Dani (Jony 64′), Jonás (Bryan 74′), Hugo
Goles:
1-0 Marcos Iglesias 81′
Árbitru: Baniela García. Amonestó a Hugo y Peláez pol Ciares, y a Cris y Pablo pol Llanera.
Incidencies: 300 espectadores nel Campo de La Cruz. Terrenu de xuegu en condiciones pefectes. Los prolegómenos sirvieron pa homenaxear a Héctor, un mozu sociu ciarista que morrió de sópitu la selmana pasada.
Durante los primeros minutos paecía que yeren los visitantes los que llevaben mayor peligru. El Llanera trataba de llevar el pesu del alcuentru. Aún así, nun crearon apenas ocasiones de gol. Sólo una, que salvaba Davo saliendo rápido a tapar abaxu un ún pa ún. Los de Detori nun tan teniendo buen entamu de temporada, sumando 2 puntos solamente a pesar del plantel de nivel.
La más clara pa’l Ciares teníala Chery. Disparaba duro de primeres un balón rechazáu tres d’un córner y el balón se marchaba llambiendo’l poste izquierdu visitante. Pocu bagaxe nos primeros 45. Los dos equipos xugaben encorsetaos, buscando non encaxar.
La segunda parte paecía llevar la mesma dirección que la primera. Pocu xuegu y nun ceder ocasiones. Dos vieyos conocíis como Tino y Detori paecíen xugar a lo mesmo. Sicasí, a partir de la metá d’esta segunda parte, lliberáronse cadenes.
Provocó les hostilidaes el Llanera. Gran xugada, que finaliza’l llateral zurdu nun mano a mano con Davo que salva de forma providencial el guardameta xixonés. Foi la más clara del Llanera, y la última.
A partir d’ehí foi’l Ciares l’únicu que buscó la victoria. Munches más llegaes al área del Llanera, que fue metiéndose atrás.
La primera foi pa Javi Gutiérrez. Buena subida de Chery pela banda que finaliza con centru. Cae-y el balón a Javi que dispara ensin porteru pero salva la defensa cuando se colaba. Actu seguíu ye Marcos el qu’avisaba. Buen disparu dende la frontal del área que marcha por poco cuando buscaba la escuadra izquierda.
A la siguiente nun perdona. Balón que-y llega d’espaldrs a puerta, y se busca la vida pa revolvese y sacar un disparu durísimu pa subir l’únicu gol del alcuentru cuando yá s’averaba’l minutu 90.
El Llanera intentólo, con más voluntá que fútbol. Llanzamientos llaterales, balones al área, y poco más.
Paez que’l Ciares ta cambiando la tendencia. Si empezó la temporada perdiendo partíos axustaos, agora ta ganándolos. 4 victories en 5 alcuentros pa colocase na zona templada de la tabla. Lloñe de los puestos de play off, pero lloñe tamién de los puestos de peligru. Cola mirada puesta arriba, agora va a Pravia pa disputa-y los puntos a un Pravianu n’apuros. A por 3 más.