[Ciares 2-0 Llanes] Iván El Terrible

Doblete d’Iván Suárez, que da la victoria al Ciares sobre’l Llanes nel domingu del Boxing Day y lu lleva hasta los 29 puntos.

El Ciares va al parón navidiegu cola sensación de los deberes fechos. A pesar del mal comienzu, termina la primer vuelta octavu, con 29 puntos. Tovía un poco despegáu del puestu de promoción, a 9 puntos del Llanes, pero cola mira puesta en continuar cola racha y siguir esguilando puestos. Los más cercanos agora, Cuadonga y Uviéu B, con 4 puntos más.

Nun yera una xornada más en La Cruz. Tratábase del “Boxing Day”, el día dedicáua la reciella, y posiblemente el partíu más especial cada temporada. El calendariu d’esti cursu, con parón hasta’l 8 de xineru debíu a que los festivos caen de domingu, obligaba a adelantalu respectu a otros años, cuando se disputaba en víesperes del Día de los Reis Magos.

Entamó muncho meyor el Ciares. El Llanes, pese a un centru del campu de muncha calidá, y al que-y gusta tener el balón, yera sometíu polos de Tino, más metíos nel alcuentru. La primer media hora tuvo un gran color coloráu, cola mala suerte de nun conseguir materializar nenguna de les clares ocasiones creaes.

Malpenes comenzara l’alcuentru, Javi Gutierrez, con una mestura d’habilidá y potencia marcha pela llínia de fondu, cede pa Marcos, el balón va a Cris qu’entraba solu, pero’l disparu sal-y demasiáu cómodu pa Jose, guardameta llaniscu.

Poco dempués, otra vez yera protagonista Cris, pero se llucía Jose pa refugar el disparu. La más clara, pa l’otru estremu. Gran xugada de Guille Barquero, pero nel mano a mano frente al porteru visitante el so disparu cola pierna zurda diba arriba.

Tres d’esa oportunidá enfrió’l partíu. Seguíen siendo más protagonistes los llocales, pero dexaron de crear peligru a la meta rival. Nacho, per otra parte, disponía d’unos 45 minutos tranquilos, con pocu trabayu.

En sólo 7 minutos decidióse la segunda metá. Un error de Jose yera aprovecháu por Iván Suárez, que disparaba dende’l Campu del Manuel Rubio y batía pelo alto la meta llanisca. Gran gol qu’abría la llata.

Poco dempués, el propiu Iván aprovechaba una gran dexada de cara de Marcos pa fusilar y dexar l’alcuentru sentenciáu. De nuevu gran gol pal centrocampista llegáu del Condal, qu’empezaba la temporada como llateral diestru.

En nengún momentu se vio al Llanes capaz de llevantar l’alcuentru. Nin tan siquiera cuando’l cuadru coloráu-yos cedió más el balón, buscando retrasar llínies. Pese a pisar más área llocal, nenguna ocasión reseñable.

De fechu, la más clara foi llocal. Penalti clamorosu sobre Marcos. Llánzalu abaxo’l propiu ariete, a la derecha del porteru. Gol. Sobredosis de pitíos per parte del Colexáu. Esi nun valía, hai que tirar otru. Al mesmu sitiu, pero lo refuga’l poste.

Dos grandes noticies pa rematar l’alcuentru. Una foi’l tercer debut col primer equipu d’un xuvenil esta temporada. Foi Javi García, que sustituyía a Marcos nel descuentu. La otra, la vuelta de Juan Carlos, llesionáu nel alcuentru frente al Llangréu, fuera del equipu dende diba unes selmanes.

Agora toca descansar, escesos navidiegos, buenos deseos, y recibir al Sporting B, nun de los alcuentros más esperaos de la temporada. Los de Mareo lficiéron-y un siete a los de Los Pericones na primer vuelta. Pero nun siempre se repite la historia.