Asaltu nazi a La Cruz esta alborada
Esta alborada, aprovechando la nueche, un grupu de persones enllenaron La Cruz de pintaes nazis como esvástiques y cruces céltiques.
Tres estrozar la muria de Against Modern Football, intacta en La Cruz dende fai más de cinco años ya iconu del ciarismu, pasaron dientro’l campu, chiscando tola grada de pintura, tornando a dibuxar simboloxía facista, y tachando l’escudu y nome del club.
Pa intentar sembrar la confusión, también ficieron pintaes d’otru tipu, modus operandi que recuerda a los ataques qu’esta misma selmana sufrieron partidos políticos y asociaciones de Llangréu, como pudimos lleer na prensa asturiana, nos que también s’estrozaron murales y se ficieron daños asemeyaos.
Estos fechos van ponese en conocimientu de la policía cola denuncia pertinente. Así mesmu, queremos recordar qu’el fascismu, el racismu, la violencia o cualquier forma de discriminación nun tien cabida en La Cruz, por representar valores nes antípodes del fútbol nel que la masa social del Ciares cree, y qu’amás promueven les instituciones futbolístiques a nivel internacional.
Casualmente esta agresión tien llugar cuandu tamos a puntu d’anunciar qu’el Vienres, nel Colexu Xovellanos, y en collaboración cola ONG d’ayuda a África, LATE, organizamos un tornéu pola integración. Nos próximos díes fadremos pública tola información, y vamos vivilo con más ganes tovía de les que ya tiníamos.
Por suerte el nuesu club tien bona salú y muncha participación, polo que nos próximos díes va facese una sestaferia para reparar tolos daños causaos en La Cruz, ya iguar los símbolos del U.C. Ceares y el mural escontra’l fútbol modernu.
Por si ellos nun lo saben, vamos dicilo otra vegada: