El Athletic Club visita güei La Cruz

Guei a les 18:00 en La Cruz, con motivu’l 70 aniversariu del nuesu club, van xugar les nueses rapaces del Gijón Femenino escontra les campeones de Primera División, el Athletic Club.

Les campeones de lliga visiten La Cruz. Pocu dempues de ganar el títulu, el Athletic Club fae una visita hestórica al nuesu barriu pa celebrar el 70 aniversariu del U.C. Ceares. A les 18:00 van enfrentase al Gijón Femenino, nun autu qu’amas de ser un partíu hestóricu y de primer nivel que de xuru va esfrutar el públicu, va servir pa da-y visibilidá a les muyeres nel fútbol llocal, un pasu na creciente reconocencia y normalización del fútbol femenín. La entrada va ser de solo 3€, siendo de baldre pa menores de 18 años (18 incluyio).

Pero dase la casualidá que nun ye la primer vegada que l’Athletic Club visita La Cruz. Nel añu 2005 tres proclamase campeones, también viaxaron a La Cruz pa enfrentase a un Gijón Femenino qu’acababa de xubir a la Primera División, ganando al final les vasques nun paríu bien igualáu.

Además, mientres el partíu la asociación Score a Smile Project Philippines va tar en La Cruz recoyendo material deportivu pal so proyeutu de sofitu a neños y neñes ensin posibles en Manila, Filipinas. Playeros, botes de fútbol sala y de fútbol campu, espinilleres, camisetes, y hasta ropa de vestir, too pa peques ente 5 y 16 años, y así ayudalos a que’l fútbol seya un abeyugu nun entornu bien complicáu.