[Caudal 0-0 Ciares] Santu Bárbaru empate

L’equipu de Miguelin realizó un sobriu partíu nel Hermanos Antuña. Y el Caudal namás-y fizo sufrir nos últimos diez minutos.

Sonaba l’alliniación del Ciares por megafonía, y empezaben les cábales. Nin por asomu paecíase’l dibuxu al de les anteriores xornaes. Fonso llantábase como estremu derechu, per delantre de Rigo, tapando les xubíes de Noel Alonso. Chery recuperaba la titularidá, y Cris Alonso sustituyía a Ponte enriba, buscando la velocidá.

Taba claro qu’ante’l Caudal diba sufrise. Equipu potente en toles llínees, xugadores con esperiencia en categoríes cimeres a la Tercera, forma de trabayar profesional pa un equipu amateur. Sicasí, los primeres 45 minutos nun afiguraron tal diferencia.

El Caudal tenía más el balón, pero nun foi capaz de poner a prueba a Kike. Nin siquier al traviés de córners fueron capaces de disparar a puerta. El Ciares sicasí taba bien tras, Fonso encaxábase como llateral cuando atacaben los mierenses. Costaba enforma llegar enriba.

Foi Pablo Martínez el primeru en soltase n’ataque. Gran maniobra ente llínees, vase de dos xugadores y xuega sobre Cris que nun puede remachar. Poco dempués, el mesmu Cris, nun llega al remate. Y cambéu.

Díbase Cris Alonso mancáu, y entraba Polo, flamante nuevu fichaxe. Y empezaba fuerte. Balón que-y cai de les nubes, gran control cola derecha y disparu cola maniega. Vase fora. Na siguiente xugada díbase por banda derecha y dispara enriba. Pinta bien.

Llegábase al descansu cola sensación de que l’empate a ceros yera xustu, y de que sería difícil camudalo.

Pero la segunda parte empezaba frenética. Dos llegaes a cara área n’apenes cinco minutos, incluyendo una falta pa Pablo Martínez que se-y diba alta, y la posible espulsión de Saavedra perdonada pol colexáu. Paecía posible’l 2 na quiniela.

Con más músculu que fútbol, sicasí, el Caudal foi imponiéndose. Les oportunidaes nun llegaben, y Kike siguía esforciándose namás pa estenar de puños. Y asina pasaben los minutos.

Polo volvía intentalo. Roba-y el balón a Jano, marcha pola banda derecha, supera l’agarrón, intérnase na área, pero la defensa refuga’l disparu de Pablo Martínez.

Cuando quedaben quince minutos esperaba sufrimientu. Enforma balón enriba, y enforma centru llateral. Los minutos empezaron a ralentizase, l’equipu metíase tras. Fonso y Bryan, los dos estremos, convirtiéronse casi en llaterales.

Quedaben nueve, y entraba Ponte. Y dio guerra. A la primera vase unu con una finta, combina con Pablo Martínez, y dexa solu a Bryan frente a Bussman. El linier decreta fora de xuegu que nun yera y albuerta la xugada.

Aforfugaba’l Caudal. Siguía probando dende banda. Córners, centros, córners, centros. Pero la más clara ye pa los teyeros cuando yá amorrentaba’l partíu. Vase Ponte per banda, pase de la muerte pa Pablo Martínez, pero el so disparu espéyalu Bussman cuando yá se cantaba’l gol.

Gran puntu, y gran Ciares. Los brickers agora tánse midiendo a los de riba y siguen respondiendo. Y caltienen la fe.