[Ciares 2-2 Pravianu] La suerte también xuega

Fantásticu espectáculu en que nos brindaron el vienres dos equipos que lluchen costazu con costazu, pol play-off. Llueñe d’esibir un gran xuegu, los dos escuadres consiguieron marcar siempres nel momentu precisu. L’empate final paez xusto, pero la victoria pudo cayer pa cualquier llau.

Con una gran entrada en La Cruz, saltaben al campu los dos equipos revelación de la temporada. Polos locales, les baxes de Pichón, por mancadura, y de Meana, por sanción, llindaben los recursos del mediocampu. El Pravianu ye un equipu de los tapaos. Pero col so xuegu paez cada vez más una alternativa real. Demostró ser un conxuntu perbién trabayáu. Inclusive quedándose con 10, nun se demostró sobre’l campu la so inferioridá numbérica.

Empezaba apoderando’l Ciares. La espectacular llínea de 3 de los brickers, Borja Argüelles, Jimmy y Pelayo Torre, entraba enforma en contactu col balón, pero faltaba l’últimu pase. Esi momentu en que se decide si la xugada ye peligrosa o non, L’alcuentru apostábase sobremanera nel campu del Pravianu, pero nun éramos a sentir nengún “uy” nes grades de La Cruz.

Y el partíu camudó de sópitu. Falta alloñada de la área de Kike. Al cancerberu local escápase-y el balón, y Dani Girol emburriaba a la rede. Primer llegada del Pravianu al área y gol. Cerca del descansu’l conxuntu visitante adelantrábase y un nuedu poníasenos nel gargüelu.

Pero, cuando peor taben les coses pal Ciares, Pelayo Torre clavó’l so disparu na escuadra de Raúl. Tres una gran xugada de Borja Argüelles, el balón cayía-y al mediapunta xixonés que la enchufaba. N’apenes 5 minutos, el partíu decantárase yá pa los dos equipos.

Hasta’l descansu inda tuvo otra’l conxuntu teyeru. Falta llateral que bota Óscar Ruiz, y Borja Noval remata a gol. Cuando yá se celebraba’l gol, l’árbitru anula’l gol a instancies del so xuez de llínea, que vio la mano previa.

Llegábase al entemediu cola sensación de que’l partíu inclinárase escontra’l llau local. N’empatando, y con más posesión, paecía que se llevaría’l gatu l’agua. Esa sensación apinóse cuando nel minutu 47, el visitante Aitor yera espulsáu por segunda mariella. Empataos y 43 minutos per delantre.

¿Qué podía fallar?

Na siguiente xugada, marca de nuevu’l Pravianu. Balón na área que Morán manda al palu curtiu. Auténticu xarru d’agua frío. Cuando más cerca víase la victoria local, yeren los visitantes los que cutíen.

Pero namás 5 minutos dempués, golazu de Rubo al asitiar el balón percima de Raúl dende’l perfil derechu de la área. 2-2 y enforma tiempu per delantre.

¿Qué podía fallar?

Pero el Pravianu demostró que ta terceru por daqué. El Ciares, quiciabes abusando del balón en llargu, y ensin poder tocar el balón tantu como de costume, nun consiguió crear ocasiones. Ye más, amontábase la sensación de peligru visitante. Esa sensación amontóse cuando Fonso Bellón foi espulsáu pola so segunda mariella. Guille per una banda, y Barto pola otra triaben al área costantemente. El Ciares sufría más de lo normal, nun tenía’l balón. Y los brickers precisen el balón.

L’últimu plasmu del día diolu Kike en respondiendo a una agresión. Corría’l minutu 79 cuando emburriaba a un rival que primeramente -y trió y llanzó una manotada que tornó’l porteru local. Tres unos segundos ensin respiración, l’árbitru castigó l’acción de Kike namás con mariella.

D’ende a la fin, ausencia d’ocasiones. Puntu que puede satisfaer a dambos, al Pravianu por tar contra les cuerdes enforma tiempu, y al Ciares por talo a la fin. Esti puntu déxa-yos a dambos caltenese na zona noble de la tabla. Y tar por méritos propios, como quedó claro’l domingu.