[Ciares 0-0 Condal] Puntu capital
El Ceares llogra un empate ante’l líder absolutu de la categoría nun partíu nel que nin teyeros nin noreñenses arrenunciaron a consiguir el trunfu.
Nueve victories y un empate, esi yera’l tarrecible currículum que presentaba’l Condal ante la so visita a La Cruz. Un equipu que llegaba a la Teyerona con puntuación d’auténticu récord.
Ciares 0 – 0 Condal
Ciares: Davo; Fonso, Lozano, Beni, Aitor; Predes, Jorge Vázquez (Jimmy 46′), Pablo Martínez, Juan Carlos, Piñera (Cris Alonso 46′) y Polo (Ponte 65′)
Condal: Lastra; Zapico, Rufi (Javi Álvarez 67′), Mori, Adolfo; Pablo Hernández, Rueda; Carly, Peña (Juanín 63′), Moisés y Jairo Cárcaba.
Árbitru: Fernández Fernández (Uviéu). Amonestó pol Ciares a Jimmy y Prendes y pol Condal a Rueda y Carly.
Incidencies: Alcuentru de la undécima xornada de la Tercer División d’Asturies xugau en La Cruz ante unos 400 espectadores, 50 del Condal. Terren de xuegu en perfeutes condiciones. El equipu local sacó una pancarta mientres-y facien la foto denunciando los tres años ensin lluz nel Colexu Campoamor, onde entrenen los neños de pista.
En cuanto salieron les primeres fueyes d’alliniaciones empezaben les especulaciones, Miguelín dibuxaba un equipu con munchos mediocampistes, y ensin estremos. Tocaba asitiar nel campu a Priendes, Jorge, Juan Carlos, Pablo Martínez y Piñera, cuando a priori toos ellos xugaben na mesma posición. Finalmente Pablo dexóse cayer a banda derecha, y Piñera a banda esquierda.
La primer parte tuvo claru color visitante. Sicasí, los 45 minutos pasaron ensin ocasiones pa nengún de los dos. Namás el vientu, protagonista d’esta primer metá, tuvo a puntu de dar dalgún plasmu.
El Condal llegaba bien a llínea de fondu, pero nun consiguió engabitar nengún últimu pase. Centros llaterales, con Moisés, Carly y Cárcaba como principales actores, pero nengun remate.
Al descansu, Miguelín camudó l’equipu, nel vestuariu quedaríen Jorge Vázquez y Piñera, y saltaben al campu Jimmy y Cris Alonso. El capitán ocupaba la so parcela, y Cris encargábase de buscar los rebelgos dende banda esquierda.
Coincidía cola meyor etapa del Ciares nel partíu. Jimmy bordaba el fútbol dende la media punta, controlaba, miraba, distribuyía. El Condal empezaba en sufrir en defensa. La ocasión más clara del partíu sería pa los locales. Recibe Lozano d’Aitor Cañedo. Gana metros. Cuando paez que la va dar a Aitor de nuevu, centra al segundu palu onde entra Prendes solu, pero’l so remate col interior díbase alto.
Yera Jairo Cárcaba quien daba’l retruque, balón que-y queda a los pies tres refugue de la defensa, pero’l so disparu dende la media lluna de la área buscando la escuadra vase fora.
D’ende a la fin, partíu llocu, y sensación de que cualesquier de los dos equipos podría llevase la victoria. Aportunó más el Condal, pero tampoco fueron clares les sos ocasiones.
Empate que puede considerase xustu. Dambos equipos tienen pinta de lluchar polo máximo esta temporada, dambos tienen un estilu similar, y dambos tán sacando rendimientu. Al Ciares tóca-y viaxar al Oriente, a Posada de Llanes, pa enfrentase a un Urraca C.F. al que conocen dende Copa Federación, y que tamién tien blimes pa tar enriba.
Namás va un cuartu de competición, y la cosa ta qu’ambura. Cinco equipo en dos puntos lluchen pel cuartu puestu de play-off. Unu d’ellos el Ciares. La Tercer División ta cada vez más prestosa.