[Ciares 0-0 Sporting B] El Sporting túvolo prieto
El filial roxiblancu, de negro, nun pudo con un Ciares que sigue cola so progresión. Los de La Teyerona siguen mirando pa arriba na tabla.
El primer partíu de la temporada pa’l Ciares foi un desastre. Encaxaben 7 goles en Mareo nun alcuentru nel qu’en nengún momentu tuvieron. Y eso que na Copa Federación dieren la cara frente a dambos filiales. Esi siete marcó pa mal les xornaes suguiented, con un duru 0 de 12 al entamu.
Ciares 0 – 0 Sporting B
Ciares: Nacho; Natan, Fonso, Beni, Chery; Cris García, Hugo (Juan Carlos 60′), Iván García; Cayarga (Guille 74′); Javi (Pablo Martínez 89′) y Marcos Iglesias
Sporting B: Dani (Javi 63′); Cifre, Pelayo, Víctor, Ramón; Cris Salvador, Pedro (Berto Cayarga 63′), Nacho Méndez; Pablo, Claudio y Jaime Santos (Álvaro 87′)
Árbitru: Baniela García (delegación d’Avilés). Amonestó a los llocales Hugo Álvarez, Beni y Marcos Iglesias y al visitante Cifre.
Incidencies: Partíu correspondiente a la vixésima xornada de lliga en Tercera División, disputáu nel prau de La Cruz, que rexistró una gran entrada.
Pero’l Ciares que visitó Mareo nun ye’l Ciares que recibió ayeri al Sporting B. Un conxuntu ensin fisures atrás, mui trabayáu. Natan y Chery nun estáu de forma espectacular nos llaterales, y Beni y Fonso formando una muria infranqueable. Per delantre, el trabayu d’Hugo echóse en falta cuando na segunda parte marchana llesionáu. Y por si fuera poco, Nacho baxo palos. Al Ciares nun ye fácil marca-y gol.
Y eso qu’ayeri nun-y lo pusieron fácil a Tino para faer l’once. En medio’l prau, Dani Peláez yera baxa por acumulación de tarxetes. Amás, Juan Carlos y Pablo Martínez, qu’acusan cierta inactividá dempués de les llesiones. Total, que xuntó na medular a Hugo con Iván, que venía d’anotar un doblete y de dir asentándose nel equipu, dempués d’un entamu de temporada nel llateral diestru. Jorge Cayarga, que s’enfrentaba al so hermanu Berto, y Cris peles bandes. Y arriba dinamita, con Javi y Marcos.
Yá dende’l principiu paeció claro que La Cruz nun diba ser un camín de roses pa’l Sporting. Pese a tener el control del balón, nun podíen colos llocales. Nel Ciares, los 11 mordíen ensin dar un balón por perdíu.
De fechu, la ocasión más clara foi pa los coloraos, nun remate de Cris que colaba mordiendo’l palu tres d’un gran balón puestu por Javi Gutiérrez.
Pa los de Mareo, poco. Un disparu dende’l costáu derechu qu’atrapaba mui seguru Nacho y un remate dende dientro l’área qu’obligaba a llucise al meta xixonés.
La segunda metá arrancaba cola metor intervención de Nacho, al resolver un disparu a bocaxarru del central sportinguista Pelayo tres d’un llanzamientu de córner. Foi la ocasión más clara del alcuentro pa los de Jose Alberto, sentáu na grada cumpliendo sanción.
Estos segundos 45 fueron accidentaos. Primero parábase l’alcuentru pa atender a Hugo, que finalmente retirábase llesionáu, dando entrada a Juan Carlos. Poco dempués, yera’l guardameta sportinguista el que tenía de dexar el so sitiu, tres d’un alcontronazu con Javi Gutiérrez.
La ocasión clave yera teyera. Gran balón de Marcos, pero va-y un poco alto a Javi Gutiérrez pa’l remate y nun ye a precisar. Cae-y a Cris pero cola pierna zurda nun puede finalizar con too a favor.
Pasaben los minutos y la sensación de que podía marchar colos puntos el Sporting yera más por calidá que por xuegu, yá que nun terminaben les xugaes n’ocasión.
Yá nel descuentu, túvola’l Ciares. Gran salida al contraataque, con Guille Barquero y Pablo Martínez arrancando como búfalos. Balón pa Marcos Iglesias que cayera a la banda izquierda, vase escontra’l mediu pero dispara mal. Ehí terminaba l’alcuentru.
Mui buen punto pa los teyeros, y insuficiente pa los visitantes, que ven como nun terminen d’alcanzar a los dos d’arriba, Avilés y Llangréu. Agora a los de Tino tóca-yos vengase con L’Entregu, que marchaba colos puntos de La Cruz na primer vuelta.
Pero nin el Ciares ye’l que recibió a L’Entregu na xornada 2, nin L’Entregu ye’l que marchó colos puntos de La Cruz.