[Ciares 0-1 Llanes] Una piedra nel camín
Los futbolistes d’Eraña nun executaron un buen partíu y un ordenáu Llanes llevó los 3 puntos d’una imbatida La Cruz.
[youtube]https://youtu.be/Mzp4dGWFixY[/youtube]
Una inesperada lluvia modificaba l’escenariu en Los Pericones. El típicu orbayu asturianu arrancaba a mediudía y calteníase durante tola tarde. Como consecuencia, campu más llentu y entrada más probe.
Iñaki Eraña repetía l’once que’l pasáu domingu marchaba colos puntos del Rabanal tres d’un estraordinariu alcuentru. La novedá taba nel banquín, cola vuelta d’Aitor Cañedo dempués d’unos partíos sin poder participar.
Ciares 0 – 1 Llanes
Ciares: Davo; Hevia, Fonso, Beni, Chery, Hugo, César, Pablo Martínez, Marcos Iglesias, Cris y Ponte
Llanes: Gabri; Pelayo, Genero, Esteban, Diego; Esteban, Aitor; Jorge, Gael, Diego Arias y Miguel
Goles: 0-1: Gael 53′
Árbitru: Valdés Díaz (Uviéu). Amonestó a Marcos Iglesias y César pol Ciares, y a Diego, Aitor y Esteban pol Llanes.
Incidencies: Alcuentru correspondiente a la novena xornada de la Tercera División n’Asturies celebráu en La Cruz ante 250 espectadores. Terrén de xuegu un poco llentu por mor deldea agua.
Nun repetía l’arranque del últimu partíu’l Ciares. Yá dende los primeros minutos vióse a un Llanes que venía cola llección mui bien deprendía. Consiguieron maniatar a los llocales y el balón nun circulaba pel centru’ prau como otros partíos.
De fechu, la primera ocasión foi visitante, nun testarazu en plancha que diba picáu xunto al palu derechu defendíu por Davo.
Les ocasiones nesta primera parte brillaron pola so ausencia. Pal Ciares, centru xenial per baxo de Pablo Martínez que despexa la defensa visitante cuando Marcos Iglesias llegaba pa emburriala. Y nel últimu instante, Cris Alonso revuélvese dientro del área, pero’l so remate vase arriba tres d’una falta executada tamién por Pablo Martínez.
Llegábase al descansu tras una igualada primera metá, trabada, intensa, pero con pocu fútbol. Los equipos retiraben a vestuarios cola sensación de poder tener fechu más.
Sin embargu, nel descansu paeció desconectar el Ciares. Durante la segunda parte l’equipu nun furruló. Nun mantenía la posesión, y nun llegó apenes al área visitante.
Y ye que nos primeros diez minutos d’esta segunda metá cambiaron muncho les coses. Una llegada per banda izquierda que terminó con disparu al llateral de la rede defendía por Davo. Poco dempués, Gael revolvíase y a la media vuelta batía per baxo al porteru formáu na Inmaculada.
Sólu diben cincuenta y tres minutos de partíu, había tiempu pa too. Inmediatamente, otru duru golpe. Un Álvaro Ponte n’estáu de gracia pedía’l cambiu tras xugada nel área visitante. Entraba Raúl nel so llugar, xugando como enganche per detrás de Marcos. Volvía también Aitor, sustituyendo a Hugo, home por home.
L’apuesta de Raúl taba claramente enfocada a la posesión del balón. Un xugador que combina mui bien y puede asociase con xente del so perfil, como Pablo Martínez o César. Sin embargu, el balón en nengún momentu llegó a circular con claridá per La Teyerona.
La más clara de los llocales foi pa Raúl, nun remate nel segundu palu qu’atrapaba’l porteru llaniscu. Foi la más clara y casi la única d’esti periodu.
El Llanes pudo ampliar la ventaxa. Jony atopóse con un gran balón servíu por Aitor Tornavaca, pero nel mano a mano con Davo definía torpemente y díbase-y el balón altu. El veteranu Aitor, que zarraba un partíu redondu mandando na so zona y marcando’l tempo del alcuentru.
Al final, el Llanes llevaba los puntos. El so orden foi bastante pa sumar una victoria. Los teyeros visiten el prósimu llunes al equipu revelación de la temporada, el Colunga. Güei toparon con una piedra nel camín, pero queda muncho por andar. Y naide dixo que fuera fácil.