[Ciares 0-1 Pravianu] Too al uno

Segunda derrota consecutiva como llocal pal Ciares. Los d’Eraña nun s’afayaron nel campu en nengún momentu.

[youtube]https://youtu.be/2vfcHELTCFg[/youtube]

El fútbol ye una ciencia totalmente impredecible. Si dalguién s’atreve a calificala como ciencia, claro. Llegaba’l Ciares d’un de los sos meyores partíoos que se recuerden, goleando a domiciliu a un Colunga estable nos puestos altos y imbatíu como llocal. La otra cara de la moneda yera’l Pravianu. Al filu de los puestos de descensu a Rexonal Preferente, con sólu dos puntos de los últimos 15. Si dalguién hubiere teníu qu’apostar, hubiérelo tenío claro. Too al uno.

Inaugurábase l’horariu d’iviernu. Domingu pela mañana. Al Veranín de San Martín sóbra-y el diminutivu. Más de 20 graos asombren a propios y edraños, increíbles pa estes altures del añu. El prau llucía espectacular. Apetecía ver fútbol, apetecía ver a los d’Eraña. L’entrenador teyeru daba continuidá al once titular qu’esllumara en Colunga.

La novedá empezaba’l partiíu sentáu nel banquín, primera convocatoria de Jimmy, capitán de los llocales, que superaba la so lesión y volvía a vistise de cortu. Somos animales de costumes, y ver al Ciares, que suel arrancar atacando escontra’l fondu de la Cantina, facelo escontra’l Fondu Norte sorprendía. Y sorprendía más nun velos atosigar al visitante como la pasada xornada. El partíu yera munchu más trabáu, y nun circulaba igual el balón. De fechu, Davo foi’l primer protagonista, al salvar a los coloraos.

La primer llegada ciarista tuvo la rúbrica de Cris Alonso. L’esplosivo estremu disparó duru, secu, abaxu, pero repelía Raúl. Una gran internada suya, pisando la cal de la llínia de fondu nun atopaba rematador. La más clara d’esta primera parte, y de la segunda, yera pa Pablo Martínez. Dientro l’área, d’un trallazu, trataba de batir a Raúl pero’l cancerberu visitante llucíase. Aitor intentólo nun córner. Alzábase bien y remataba francu, pero cruciábala por demás. De nuevu Pablo fízonos cantar gol na primera xugada de la segunda parte. Saque de banda de Fonso buscando a Beni. El balón cae-y a Pablo. Controla con tola clase dientro l’área, y sin dexala caer crúciala, pero marcha fuera por centímetros. De nuevu Cris volvía a poner a prueba al porteru visitante. Un disparu suyu envenenábase al tocar nun defensa.

Sin embargu, enfrióse’l partíu. Y darréu yera la Cruz la que s’enfriaba, cuando un contrataque pravianu terminaba con un remate axustadísimu al palu de Davo que significaba’l primer, y a lo postrero únicu, gol del partíu. Jimmy volvía al prau, y lo facía por un Beni, que lo tuvo intentáu de toles maneres posibles. Salíes de la cueva inclusive. Con tou sobre’l campu tampocu consiguieron poner en demasiaos apiertos a los visitantes, mui metíos atrás, y que tuvieron la más clara. Cuando n’otra contra, y con tol tiempu del mundu, disparaben al llargueru.

Dura, y inesperada, derrota del Ciares. Agora espera’l Tinéu, recién ascendíu que taba faciendo les coses las mui bien pero lleva encaxaes cuatro derrotes consecutives y que se asoma al abismu.

¿Apostámoslo too al dos?