[Ciares 0-1 Urraca] El Ciares marcha de puente
Inoperancia pa los llocales, y victoria cómoda pa un Urraca necesitáu, que llevó los tres puntos gracies a un golazu de Pascual.
Tolo bueno que fizo’l Ciares nel alcuentru contra l’Urraca fízolo enantes de empezar el mesmu. Nos prolegómenos entregábense los premios George Best y Jimmy Greaves a Jimmy, no Greaves, al del Ciares, por partida doble, y a Álvaro Ponte. Estos premios distinguen al meyor xugador y al másimu goliador de l’anterior temporada. Y amás los premios entregábenlos los socios númberu 1, 2 y 3 de los teyeros. Tres persones con nada menos que 70 años como socios, siete décades de sofitu a un proyectu.
Ciares 0 – 1 Urraca
Ciares: Davo, Fonso Aitor Cañedo, Beni (Juan Carlos 68′), Chery, César (Dani Girón 77′), Pablo Martínez, Natan (Chus Naves 76′), Jimmy, Cris Alonso, Ponte
Urraca: Davo, Pablo Suárez, Guaya, Espolita, Samuel (Álvaro 84′), Boris, Dani López, Geni, César (Pablo Hernández 29′), Omar (Riki 73′), Omar Sampedro
Goles:
0-1 Pascual 21′
Árbitru: Alonso de la Lama, del Colexu d’Uviéu. Amonestó a Beni, Pablo Martínez y Aitor Cañedo pol Ciares, y a Rony pol Urraca.
Incidencies: Buena entrada nel Campu La Cruz, con abonda presencia visitante nuna tarde soleyera. Terrenu de xuegu un poco duru. L’alcuentru sirvió pa homenaxear a los socios 1, 2 y 3 del Ciares, y pa entregar los premios a Jimmy y Ponte como meyor xugador y másimu goliador de la temporada pasada.
El partíu va ser, con toa probabilidá, un de los peores a los que tengan asistíu enxamás estos 3 socios, con un Ciares inoperante, incapaz de ver de cerca al porteru del Urraca, nin tan siquiera de pisar l’área contraria pa rematar un córner. La peor versión d’un Ciares que dexa mui tocada a l’afición.
Tampoco l’Urraca, que se xugaba la vida y la única ocasión de gol del partíu tiróla fuera, nun penalti qu’inventaba’l Colexáu. El gol, dicen, ye de los que val el preciu d’una entrada. Pero ayeri non, ayeri’l preciu de la entrada nun xustificaba tal espectáculu. Pascual enganchaba’l balón de primeres dende’l mediu campu, col esterior, pa superar pelo alto a Davo y insuflar vida a un Urraca cuya plantiya nun xustifica los puntos que lleva.
Y eso que’l Ciares venía de ganar en Noreña y dar moral pa afrontar el final de temporada. Pero ayeri la moral de los aficionaos qu’asistieron al partíu baxó rodando pela Avenida de Ramón y Cajal, antiguamente Boulevard de La Cruz. Nin tan siquiera se-yos dio la oportunidá de valorar a Ricardo, el porteru visitante, yá que nin ún solu disparu a puerta, y casi atrévome a dicir que tampoco fuera, adorna les estadístiques del equipu.
Así que’l partíu resúmese rápido. Primer parte golazu de Pascual. Segunda parte penalti que nun y era d’Aitor Cañedo sobre Rony, que Pascual tira fuera. El goliador paez preferir los disparos dende 50 metros que dende 9. Una folha seca dende’l puntu de penalti paez una empresa complicada.
Bueno, y agora Lluanco. L’equipu marin remontónos na ida dos goles en malpenes 2 minutos, con un Omar Sampedro n’estáu de gracia. D’aquella, los dos equipos taben parexos, agora’l Marinu tien ente ceya y ceya metese en play-off. De fechu, na xornada 18 taben empataos a puntos y agora son 20 los puntos (con un partíu más del Ciares) que los separen.
L’antepenúltima xornada de lliga queda atrás, y con ella la triste imaxen del equipu. Queda un partíu en la Cruz, col Astur, pa llimpiar la imaxen y dar una alegría a los aficionaos. Una despedía de color a una temporada gris.