[Ciares 0-2 Cuideiru] A esperar la siguiente
El Ciares cai ante’l Cuideiru en La Cruz nun partíu igualáu nel que decidieron los detalles a favor del cuadru de Julio Arniella.
Día de fiesta en La Cruz, sol, xente. Taba tou de cara, si’l Ceares ganaba ponía pie y mediu na fase d’ascensu.. Pero nun pudo ser.
Recuperaba Nacho Cabo a el xugadores de baxa, l’alliniación yera la esperada, con toos los xugadores disponibles salvu Ponte, enfermu. Nos primeros compases apoderaba’l Ceares, dempués apoderó’l Cuideiru, y los postreros 25 minutos yeren de claru dominiu local.
Ciares 0 – 2 Cuideiru
Ciares:Kike, Fonso, Rigo, Lozano (Óscar Ruiz 79′), Borja Noval, Juan Carlos, Pablo Martínez, Borja Argüelles, Jimmy, Pelayo Torre (Rubo 84′) y Pichón (Meana 25′)
Cuideiru: Chema, Kily, Beny, Prendes, Álex, Jorge, José Luis, Sito (Iván Suárez 73′), Imanol, Juanma y Madeira
Goles:
0-1: Madeira 50′
0-2: Imanol 83′
Árbitru: Rodríguez García (Nalón). Amonestó pol Ciares a Lozano, Borja Noval y Pablo Martínez y por el Cuideiru a Juanma.
Incidencies: Alcuentru correspondiente a la trigésimo cuarta xornada de Tercera División disputau en La Cruz ante ochocientos espectadores. Los Xixón Mariners aprovecharon l’alcuentru para recaudar fondos pal so partidu de play off en Mallorca.
El primer trespiés llegó a los 25 minutos. Un bien activu Pichón tuvo que ser sustituyíu tres un posible frayatu de fibres tres un centru cola derecha. Sustituyíalu Meana, y Borja Argüelles diba pa la punta.
Coincide la dura mancadura de Pichón colos meyores momentos del club local. Meana engatilla dende la frontera de la área, pero vase alto. Y la meyor del Ciares tienla Jimmy, tres xugada de Borja Argüelles, el punta bricker dispara a espetaperru pero estena Jimmy.
Bona primer parte local. Descansu 0-0.
Xarru d’agua frío al poco d’empezar la segunda parte. Posible fora de xuegu. Los xugadores del Ciares quédense clavaos, y Madeira resuelve. El partíu poníase cuesta arriba.
A partir d’ende’l Cuideiru supo trabar el partíu. Primíen fuerte, y nun dexaben dase la vuelta a los xugadores locales. A pesar d’eso, el Ciares nun cesó.
Teníala Borja Argüelles nuna gran xugada per banda esquierda, díbase de toos, pero’l so disparu diba pal llateral de la rede cuando taba solu ante Chema.
Pasaben los minutos bien rápido. Los nervios apalpábense en La Cruz, yera un partíu importante. L’alcuentru cierrábalu Imanol, en rompiendo de nuevu’l fora de xuegu y batiendo percima a Kike.
Entá tuvo tiempu Borja Noval de bater a Chema, pero la so falta refugábala el porteru en volando espectacularmente.
Nun pudo ser, pero queden 3 partíos y l’equipu tien tou de cara. El próximu partíu ye contra’l Pravianu nun partíu que dignifica la Tercer división, onde non tou significa dineru. La tercera tamién significa fútbol.