[Ciares 1-0 Andés] Ganar, ganar y volver a ganar
L’apocayá fináu Luis Aragonés aseguraba que ganar yera’l secretu del fútbol. Y esa ye la principal reflexón del día, el Ciares tenía que ganar y ganó.
El rival paecía cenciellu, llegaba a la Teyerona con baxes, y con dificultaes a casa. Tantes dificultaes que lu torgaren sumar puntos a casa. La lluria al pescuezu, rival cenciellu, partíu complicáu.
Ciares 1 – 0 Andés
Ciares: Kike, Fonso, Rigo, Borja Noval, Óscar Ruiz, Juan Carlos, Pablo Martínez, Fran Dos Santos (Ponte 39′), Jimmy, Pelayo Torre (Meana 84′), Pichón
Andés: Patía, Alvarito, Uve, Guzmán, Dieguito, Javi (Róber 65′), Ángel, Cafú, Borja (Roberto 50′), Deivi, Sergi
Goles: 0-1: Pelayo Torre 43′
Árbitru: García Martínez, del Colexu del Nalón. Bien. Amonestó a los locales Rigo y Jimmy.
Incidencies: 350 espectadores nel campu La Cruz. Terren de xuegu en perfeutu estau.
Borja Argüelles yera baxa una selmana más, esta vegada por precuru, pero los brickers repitíen sistema. Fran Dos Santos en banda derecha, en llugar de Meana, y Pichón volvía ser el xugador más adelantráu.
Jimmy pudo abrir la llata namás empezar el partíu, pero nun pudo definir cuando lo tenía tou a favor, y el so disparu a espetaperru col esterior llambía’l palu esquierdu de Patía. Y esa foi la xugada más peligrosa del Ceares nos 90 minutos.
El balón yera coloriáu del Ceares, pero nun se llegaba enriba. El Andés zarrábase tras, y nun sufría por demás. Quiciabes demasiaes reserves pa un equipu que precisa lluchar con uñes y dientes pola permanencia. El Andés precisa sumar con urxencia, pero na primer parte nun fixo méritos.
Los minutos siguíen pasando, y namás Jimmy inténtalo de chilena. Paecía que se diba a llegar a tables al descansu. Fran Do Santos, mancáu, dexaba’l so sitiu a Ponte, que movía a Pichón al estremu esquierdu. El colexáu taba a puntu de señalar el descansu.
Y Pelayo Torre sacó’l coneyu de la so chistera.
Movíase ente llínees, recibe na frontera de la área y dispara secu cola so maniega. Gol y apoteosis.
Na segunda parte adelantraben llínees los naviegos. El Ceares camudó’l rol. Unos buscaben l’empate, los locales defendíen la so victoria.
Avisó Pichón, rematando de cabeza percima del llargueru. Segundu avisu per parte de Pablo Martínez, latigazu dende la frontera de la área que repele el poste. Y acabóse el xuegu n’ataque de los brickers.
El Andés facíase cola pelota. Engarró, quiciabes con más corazón que xuegu, quiciabes de forma caótica, pero buscó’l gol. Llegaes, ocasiones, y el Ciares cerrábase.
Plasmu mayúculo cuando Pablo Martínez salvaba por dos vegaes el gol tres llanzamientu de córner. Primeru col pie, dempués cola cabeza. Les pulsaciones acelerábense.
Final del partíu y 3 puntos d’oru pa los locales. De nuevu vuelven dormir líderes. Namás queden 9 partíos y siguen ende. Dos meses fálten-yos. Dos meses pa la machada.