[Ciares 1-0 Cuadonga] Fonso rompe l’agüeyu

Un gol postreru del llateral xixonés dexa los tres puntos en casa. Gran partíu de los futbolistes d’Eraña, pero’l gol fízose esperar.

[youtube]https://www.youtube.com/watch?v=MGGmC1TD1XI[/youtube]

Nueva reválida pa los ciaristes na so particular llucha por vencer como llocales. La se’mana pasada llegaron a raspialo al vese con 2 xugadores más frente al poderosu Caudal, pero un postreru gol d’Emilio mandaba al traste les ilusiones. Pero güei la moneda cayía del otru llau, y yera Fonso Bellón el que perforaba al fin la portería del Covadonga y llograba que los puntos nun s’esfumaran de los Pericones.

Repetía Iñaki Eraña la fórmula de los últimos partíos, xuntando a Marcos Iglesias y a Álvaro Ponte na punta d’ataque. En partíos col campu llentu como’l de güei, saben buscase la vida y lluchar los balones, amás d’aguantalo y xugar de cara.

El partíu comenzaba frenéticu, y un córner llanzáu por Natan y peináu nel primer palu a puntu tuvo de convertise nel primer gol, pero salvaba’l guardameta uvieín cuando yá Ponte se rellambía prestu pa emburriala.

Respondía’l Covadonga con un disparu que, con muncha intención, buscaba per baxo’l poste derechu defendíu por Davo.

Más clares fueron las siguientes. Na primera, Ponte marchaba del porteru azulón, pero nun podía definir. Na segunda, Marcos Iglesias robaba un balón, acomodó’l cuerpu pa definir cola pierna diestra’l mano a mano, pero’l remate salía-y mui centráu. Y paradón de Davo pa salvar el gol visitante nun remate a bocaxarru cuando se cumplíen los 35 minutos de xuegu.

Na segunda parte repetíase’l guión, con un Ciares dominante frente a un Covadonga que buscaba la contra, aunque demasiáu conformista. Nestos 45, los uvieínos nun fueron a crear ocasiones clares, mientres que los teyeros creábenles al por mayor.

La principal túvola un Chus Naves que sustituyera a Cris Alonso, cuando a puerta vacía y con too a favor, dibase-y el remate perriba’l llargueru.

Tabién Juan Carlos tuvo la suya, col porteru descolocáu disparó cola pierna zurda dende la frontal, pero un defensa salvaba cuando se cantaba’l gol.

Marcos Iglesias reclamaba un penalti cuando s’internaba nel área pela banda derecha, recortaba, y yera atropelláu. El colexáu ordenaba siguir.

Gran xugada de Juan Carlos, qu’avanzó metros a base de paredes, pisó área, y buscó’l centru fuerte perbaxo pero nun atopaba rematador.

Y cuando agonizaba’l partíu, minutu 88, córner pal Ciares, un rechace, y Fonso desatascaba y rompía’l conxuru. La Cruz vuelve a ver ganar al so equipu, Ciares vuelve a sorrir.