[Ciares 1 – 0 Llealtá] ¡Mataxigantes!
Nin la pedriscada de la mañana, nin el bastiazu a la hora del partíu, frenó al aficionáu cearista a allegar al campu de La Cruz a sofitar al so equipu cuando se xuega’l lideralgu. Una de les meyores entraes de la temporada p’atestiguar la enésima xesta teyera esta campaña.
Como na primer vuelta, Ciares y Llealtá xugabense’l lideralgu. Naquel partíu, el Llealtá llevabase los tres punto de manera afecha, y n’este foi’l Ciares quien sumaba trés y salía líder.
Terrible igualdá ente dos equipos que pueden, saben y executen un gran fútbol. Dos grandes plantiyes, que nos dexen dos grandes partíos esta temporada.
Ciares 1 – 0 Llealtá
Ciares: Pablo Díez, Fonso, Rigo, Lozano, Borja Noval, Pichón, Pablo Martínez, Fran Dos Santos (Meana 55′), Jimmy, Pelayo Torre, Borja Argüelles
Llealtá: Javi Porrón, Santi, Marcos, Keko, Borja, Piniella, Robi, Yosu, Pablo Espina (Yoni 65′), Villanueva, Lombán
Goles: 1-0: Borja Noval 50′
Árbitru: Peláez Fernández, del colexu del Nalón. Correutu. Amonestó a Fonso y Borja Argüelles pol Ciares, y a Piniella, Marcos, Lombán, Santi y Yosu polos visitantes.
Incidencies: Partíu disputau en La Cruz ante 500 espectadores. Terren de xuegu en correutu estau.
Yá la primer parte foi calentina, apenes empezáu’l partíu Pablo Martínez saca un córner dende banda esquierda y Rigo cuélgase nel aire pa rematar cruzáu, pero la defensa maliaya salva na llínea cuando la parroquia local cantaba’l gol. Sigue la xugada, el balón lléga-y al magu, Pelayo Torre, que s’interna na área dende la esquierda y el so centru chut nun ye rematáu por naide cuando trés xugadores cearistas disponiense a emburriala.
El retruque corrió per parte de Robi. Balón que queda sueltu dientro de la área y el xugador visitante, que semó’l caos mientres la primer parte, nun consigue bater a Pablo nel so disparu. Gran intervención del queríu porteru local.
Los corazones ciaristes inda tuvieron tiempu de sufrir un infartu nun córner dende banda esquierda que se pasia per delantre de la meta local con trés xugadores visitantes buscando’l remate.
Descansu cola sensación de mayor dominiu visitante, y que cualesquier de dambos podríen dir enriba nel marcador.
El penúltimu plasmu local tuvo llugar nel primer minutu de la segunda parte. Remate dende dientro de la área que refuga’l poste cuando’l fondu sur de La Cruz resignábase al gol.
Pero’l partíu dio un xiru apenes tres minuto dempués. Pelayo Torre bailla sobre’l balón, amaga, ufiertala, escuéndela, y centra pasáu. El balón cai-y a Fonsi, que controla y retaya. Penalti tan claru como cabileñu’l que realiza la defensa maliaya.
Y Borja Noval nun fallaba a la so cita col gol.
A pesar d’atopase per debaxo nel marcador, la Llealtá llegó menos a la área bricker. Namás Sergio Villanueva pudo empatar nun balón que se foi al palu. Les prieses son males conseyeres.
La más clara túvola Borja Argüelles. El mozu estremu podría dar un cursu sobre como llevase balones aéreos ensin saltar. Escápase de Santi en mediu campu, llántase ante Javi Porrón pero el so disparu cruzáu refúgalu’l meta visitante. Jimmy llegaba al segundu palu. Jimmy siempres llega al remate.
Nervios na Cruz, más polo apertao de la resultancia que pol xuegu visitante. Esplosión final. 25 xornaes, 50 puntos. La media inglesa.
Toca’l Condal, que curiosamente tamién puede acabar la xornada como líder. ¿Toca otra xesta?
Finalmente’l Condal perdió y el Praviano asítiase como lider de la 3ª División