[Ciares 1-1 Pravianu] Dexáronse dos puntos
Locales y visitantes sumen un puntu, pero marchen cola sensación de que podríen ser tres de saber remanar meyor el partíu.
Ceares y Pravianu midíen les sos fuerces en sesión vespertina de domingu. El tiempu yera caprichosu y una nube afaraba Xixón intres antes de la hora programada pal entamu. Resultáu, el campu volvíase pesáu. Primer puntu pa Xiel.
Ciares 1 – 1 Pravianu
Ciares: Kike, Prendes, Lozano, Beni, Aitor, Juan Carlos, Pichón, Raúl, Jimmy (Chery 60′), Pablo Martínez (Jorge Vázquez 60′) y Ponte (Cris Alonso 68′)
Pravianu: Pablo, Meana, Ángel, Castillo, Piquero, Fran, Girol, David, Aitor (Berto 40′), Barto (Paramio 78′) y Morán (Felipe 73′)
Goles: 0-1: Felipe 80′
0-2: Paramio 82′ (PP)
Árbitru: Fernández Buergo. Amonestó a Jorge Vázquez pol Ciares y a Berto pol Praviano.
Incidencies: Alcuentru correspondiente a la cuarta xornada de la Tercer División asturiana xugáu en La Cruz ante unos 250 espectadores. El partíu empezó con 45 minutos de retrasu por cuenta de la tormeta que cayó sobre Xixón. Verde pesáu por causa de la agua. A la conclusión del partíu, el grupu gaditanu F.R.A.C ufiertó un conciertu n’el mesmu campu.
El primer tiempu tenía claru color local. Ensin escesivu rellumu, semeyaba un equipu muncho más fechu. Bien seguru tras, que ye’l primer camín pa sumar puntos. Enriba costaba crear ocasiones, pero yera’l Pravianu’l que sufría.
Apenes empezaba’l partíu teníen los brickers la primera. Bona xugada de Ponte, pero a Pichón díbase-y llargu’l control cuando encaraba a Pablo.
Les xugaes de peligru locales paecíense toes, entrando dende banda. Juan Carlos tamién tuvo la suya. Paré, tría área, pero’l so intentu de centru tras ye refugáu de nuevu por Pablo. Y la mesma pa Pichón, tamién dende banda, tamién intenta ponela, y de nuevu refuga Pablo.
Bona internada d’Aitor. Pierde’l balón, pero recupéralu. Dribla y centra duru embaxo, pero Pablo pon la mano. Nun llegaba naide al refugue.
Pel llau visitante, córner sacáu al primer palu, tocada escontra tras, y el posterior remate salía fora. Yera’l primer avisu.
Na segunda parte camudaba’l panorama. Los de Pravia daben un pasu alantre, y quixeron apoderar más el balón. Les ocasiones en mientres estos 45 arralecíen en dambos bandos, el partíu volvíase duru.
Ponte tuvo la más clara de los locales. Queda delantre de Pablo, regatíalu, pero’l balón váse-y llargu per llínea de fondu.
Los visitantes tiénenla tamién. Primero gran xugada de Barto, vase n’última instancia de Pichón y busca el centru embaxo. El balón acaba en córner. Paradón de Kike, que salva’l 0-1 col pie. Córner de nuevu.
Los de Xiel repiten estratexa. Balón al primer palu, péñase, y al segundu llega Felipe que la enchufa. El Ceares poníase por detrás y namás quedaben diez minutos de xuegu.
Sicasí, pocu duró l’allegría pa los visitantes. Na siguiente xugada’l córner favorez al Ceares. Balón al puntu de penalti. Una figura remanez d’ente toes, álzase, marca los tiempos del remate y llimpia de telarañes la escuadra esquierda de Pablo.
Llástima que se tratara de Paramio y que la portería na que tendría de marcar taba al llau contrariu de la que foi testigu del so gol.
A la fin, empate que podría considerase xustu. Agora toca rindir visita a un Uni bien tresformáu respectu al de la pasada campaña. Otros trés puntos bien importantes, colos que caltenese nos puestos de privilexu.
Namás dos puntos dixébrenos del lideralgu. Y quíerenlu.