[Ciares 1-1 Uviéu B] Crueldá intolerable

Vuelen 2 puntos de nuevu de la Cruz nel últimu sollutu, tres l’empate del Uviéu B cuando’l partíu amorrentaba.

Repitíase l’hestoria, de nuevu esmúcense dos puntos, y ensin saber cómo. Más allá del noventa, cuando amorrentaba’l partíu, un refugue termina en gol. El Ceares ta llevando palos, pero ta reponiéndose. Xornada tres xornada suma, sigue enriba, sigue coles sos opciones. Falten unos detalles pero van llegar.

Jimmy yera baxa per enfermedá a última hora. Miguelín modificaba’l dibuxu, y convertíalu casi nun 4-3-3, con Prendes, Jorge Vázquez y Juan Carlos en mediu campu, y Chery, Bryan y Ponte enriba.

Empezaba bien el partíu pal Ceares. Dos llegaes per banda derecha de Bryan avisaben al filial uvieín de que’l partíu nun sería fácil pa ellos. La primera esbaratábala la defensa, la segunda’l porteru.

Nun se cumpliera entá’l minutu 15 cuando Prendes busca’l balón pa sacar de banda dende la zona esquierda. Balón enriba, llúchenlu Beni y Juan Carlos, y Ponte remata. Partíu de cara una vegada más.

L’Uviéu B paecía nun tener argumentos pa sumar na Cruz. El partíu tenía sabor local. Poco dempués llegaba una de les xugaes claves del partíu, cuando Bryan díabse de nuevu per banda derecha, y cayía baltáu na área. Paecía penalti claru, pero’l llínea, pegáu a la xugada, nun llevantaba’l banderín y el colexáu ordenaba siguir.

Ensin ocasiones pa nengún siguía’l partíu. Namás esmolíen los visitantes a balón paráu, mientres los locales yeren los que poníen el xuegu. Llegábamos asina al descansu.

Na segunda parte los visitantes daben un pasu alantre, más por necesidá que por xuegu. Los locales nun sufríen, un muriu tras, bien replegaos. El partíu siguía ensin ocasiones, nin locales nin visitantes.

Colección de tarxetes pal árbitru, Beni, Lozano, Jorge Vázquez, y Prendes, que vería la quinta, yeren amonestaos en cuestión de minutos. Una falta de Lozano na frontera de la área, yera utilizada polos visitantes pa pidir la segunda.

La más clara del partíu diba tenela Polo. Acaballada dende campu propiu, con un balón que metiera Jorge Vázquez. Encara al porteru, pero espera al retayu. Váse-y el balón pero cai-y el refugue. Retaya de nuevu, agora sále-y, y con tou a favor vase fuera’l so remate cola maniega. Quedaben 5 minutos, y el que perdona paga.

Última xugada del partíu. Davo refuga acrobáticamente un disparu dende la derecha de la área. El balón cai-y a Belarmino, que remata mal, pero cólase por onde paecía imposible y acaba dientro.

Aplauso ante l’adversidá. Toca’l Xixón Industrial. Toca’l derbi.