[Ciares 1-2 Caudal] El Ciares nun pesca nel Caudal

Un Caudal que terminó’l partíu con nueve xugadores, salva l’alcuentru nos últimos minutos, nun partíu d’alta tensión.

Nun yera un rival cualesquiera’l que visitaba La Cruz nesta tarde de domingu, yera’l Caudal de Mieres, líder de la categoría, con una trayectoria impresionante, y con una plantilla diseñada pa competir a buen nivel en Segunda B. Esa superioridá respectu a los demás a veces conviértese nun arma de doble filu, yá que l’ascensu pasa de ser una ilusión a una obligación, pero a los d’Ania nun paez pesa-yos la presión.

El Ciares venía d’una victoria balsámica en Siero, y encaraben el partíu del Caudal sabiendo que s’enfrentaben a un de los gallinos, pero con toles ganes del mundu. Recuperaba Iñaki Eraña a Juan Carlos pa llevar la maniella, que sustituyía nel once a Pablo Martínez, que despachára un gran alcuentru en Siero.

Arrancaba’l partíu sobre un césped blandu poles recientes lluvies, pero con buen aspectu. Pesáu, pero aguantó. Al Ciares gusta-y combinar, el Caudal tien facilidá pa lo mesmu. Pero güei el Ciares cambió’l discursu, buscó más en llargo, xugó a un fútbol más directu, y a puntu tuvo de noquiar al líder.

Golpiaba primero’l Ciares, nun remate de cabeza de Marcos Iglesias que-y salía mui centráu. La réplica mierense poníala Quero, internábase nel área y disparaba al palu cortu.

El partíu pegó un xiru nada más comenzaba la segunda metá, cuando Martins remataba un centru y adelantaba a los caudalistes. Xarra d’agua frío en La Cruz.

Nun tiraben la toalla los d’Eraña, y nuna acción mui discutida, l’árbitru señalaba penalti sobre Marcos por agarrón cuando trataba de rematar un centru dende la banda derecha. Les protestes acababen con Súper, xugador caudalista, espulsáu.

Nun perdonaba Marcos, engañaba a Bussman, y tresformaba col interior llanzando a la izquierda del teutón. El partíu taba encarriláu, y más aun cuando un inocente Noel Alonso se dexaba caer nel área y veía la segunda mariella. Dexaba al so equipu con 9 con munchu tiempu per delantre, frente a un Ciares que foi superior durante’l restu del partíu.

Pero inesplicablemente los de Ciares tresformáronse a partir d’esta segunda espulsión. Crecieron los nervios, y el Caudal, a base de garra, foi’l que más peligru creó. Así, a falta de 2 minutos, batíen a Davo tres d’un rechace, dexando rotes les esperances teyeres por quedar colos 3 puntos en xuegu.

El fútbol vuelve a demostrar que ye mui difícil de predecir, y que dirntro d’un partíu pasen munches coses. Güei los 90 minutos fueron momentos d’ánimu, d’alternatives, de pasión, y de guerra.