[Ciares 2-0 Industrial] El Ciares gana’l derbi

El Ceares imponse nel derbi xixonés de Tercera al Xixón Industrial por inercia. La del equipu teyeru esta temporada ye positiva ente que la de la escuadra fabril ta nel polu opuestu.

El vezu de los brickers nesta campaña ye’l trunfu, ente que el de los albigranas la derrota. Esa rutina que yá ficieron suya los futbolistes de Nacho Cabo de les resultancies positives foi una fuerza motriz que tuvo un poder d’atracción sobre la victoria cola que nun cunten los de Javi González. Y esos intanxibles nel fútbol decanten resultancies. Eso y una acción a balón paráu que sirvió al Ceares pa desapexar un alcuentru nel que nunca se sintió cómodu pol notable faer tácticu del Indus. Escurría’l minutu cincuenta y cuatro y Borja Noval executó con maestría un llibre directu buscando la escuadra esquierda de Dongil. El balón se estampó contra’l llargueru y el refugue cayó-y a un astutu Borja Argüelles pa faer españar La Cruz d’alegranza asitiando’l balón xuntu al poste derechu de la meta fabril.

Hasta entós la equidad nel alcuentru fuera máxima. D’ello encargóse Javi González que trazó dos línea de cuatro bien cohesionadas y atinó de plenu al allugar a Álex como mediu centru creador al pie de Masse. Una posición na que por dinamismu, percorríu y calidá l’ex del Sporting puede apurrir enforma al Industrial. Per delantre d’ellos Iván Longo como gabita y Magadán en punta. Pela so parte Nacho Cabo echó a la derecha a Pablo Martínez pa dexar a Jimmy el so espaciu na media punta, con Pelayo Torre na esquierda y Borja Argüelles como punta de llanza con llibertá de movimientos. El problema ye que los futbolistes más talentosos de los teyeros nunca se sintieron a gustu porque Boli y Dani Rio anubríen-yos los espacios con criteriu escoltaos por Masse y Álex.

Costaba reconocer a un Ciares incómodu col balón nel so poder, obligáu inclusive a xugar a rodapiellu del so estilu combinativu. Frutu tamién en parte de la presión qu’imprime’l tar lluchando por un oxetivu históricu. Sicasí l’Industrial, magar tar apuráu pola necesidá de puntuar pa salir del pozu, paecía un conxuntu más llixeru, más desprovistu d’atadures. Pero desgraciadamente pa los fabriles ensin un ápice de pegada. Asina lo evidenciaron con dos talos disparos intrescendentes de Llongu y Javi. Asina les coses namás un erru nuna zona de riesgu podía causar un disgustu a los albigranas. Como’l que cometió Magadán a los trenta y ocho minutos apurriendo un balón nel so campu a Pablo Martínez, pero por fortuna pal delanteru l’intencional disparu del talentosu futbolista ciarista perdióse a la izquierda de Dongil. Namás dos minutos dempués otru fallu gruesu de los visitantes tuvo cerca d’allegrar la vida a l’animosa parroquia local. Álex dio un pase fallíu a Pelayo Torre nel so propiu terrén y el preciosista xugador bricker unvio un gran balón a la banda esquierda pa la incorporación de Borja Noval. El llateral maniegu sacó un envelenáu centru al primer palu que Boli con arroxu y apuros esvió de la so área. Asina llegose al descansu.

Na continuación el Ciares dio un pasu alantre y empezó a apertar al Indus na so salida de balón, pero ensin xenera-y escesivos entueyos. Los fabriles siguíen sobrios y sabiendo qué faer en cada momentu hasta qu’ente la maniega de Borja Noval y l’astucia de Borja Argüelles recibieron una doliosa puñalada. Pese al llastre de la so clasificación llueñe d’esmorecer, apertaron los dientes y fuéronse a pol empate. Si nun llegó foi porque lu torgó Kike con una gran intervención tapando un disparu a espetaperru de Magadán dientro de la área, en dexando’l delanteru col molde a Lozano al triar de llombu a portería un balón y empobinase pal disparu. Ante esa ocasión dos talos técnicos reaccionaron al unísonu. Nacho Cabo sustituyó a un cargáu Jimmy por Meana y Javi González a Dani Rio por Cheik.

Un minutu dempués de los cambeos un mal estene de cabeza d’Iván Llongu al altor del centru del campu a un balón fronteru habilitó a Borja Argüelles pa dise como una flecha a por Iván Dóngil. L’atacante sacó un duru disparu con tou al so favor, pero la respuesta del guardamente foi fantástica. L’Industrial nun se sobrosaltó y con Álex reconvertíu n’interior derechu empezó a facer sufrir a los locales per esa banda. So foi l’asistencia por que Amine punxera un gran centru al que nun llegó por poco Magadán, el balón pasió pola área y cayó na esquierda por que Javi sacara otru centru que Cheik nun pudo conectar como deseyara.

L’Industrial yá xugaba daquella con Magadán y Cheik como pareya de delanteros y amoldándose a un clásicu 4-4-2. Nacho Cabo amosó los sos reflexos tácticos al mandar a Pelayo Torre a la derecha y allugar como interior zurdu al acabante incorporar Meana por qu’ayudara a Borja Noval a tapiar esa banda. Fue consiguiéndolo, pero non ensin evitar un par de respigos. Nel minutu setenta y dos, Amine, con un gran pase dexó solu na área a Masse, que incomprensiblemente executó un remate horrorosu que nun tardó en llamentar. Cinco más tarde foi Cheik, escorau a la derecha, el qu’intentó un remate picáu pa sosprender a Kike que se perdió percima del llargueru. Ende acabóse’l caudal ofensivu del Industrial.

La sentencia del Ciares llegó nel segundu minutu del tiempu añedíu nuna formosa contra empecipiada por Pelayo Torre que col so descomanáu inxeniu trazó un pase formosu pa la incorporación per banda derecha de Juan Carlos. El mediu centru punxo un centru perfectu a la área pequena onde Meana, en semi fallu, batió a Iván Dongil pa sentenciar el derbi y certificar que nel fútbol les inercies esisten y aqunque naide ver nin pueda tocar.