[Ciares 2-0 Roces] El Ciares arranca la Derbi

Tercer victoria consecutiva pa los de Miguelín, y tercer victoria n’otros tantos derbis esta temporada. El Ciares vuelve a puestos de playoff.

Amanecía Xixón más gris de lo que lo venía faciendo. Orpín, borrina, fríu, mugor. Por si fora poco, bicicletes de carretera travesando Los Periconos nel Campeonatu Estatal de Ciclocross. El tiempu, la épica, la tradición. Ensin dulda diba xugase un derbi norteñu.

Enfrentábase’l Ciares col Roces. Dos de los barrios con más identidá de Xixón. Dos barrios de la zona sur, y dos equipos que llucen arguyosos el nome del so barriu nel so escudu. Los locales, lluchando por acabar la temporada ente los cuatro primeros. Los visitantes, afaciéndose a la categoría, con puntos y xuegu como pa caltener la tranquilidá nesta segunda vuelta.

Un partíu, amás, de realcuentros. Edu y Teto, nel campu, y Nijo y Pelayo, fora por mancadura, volvíen a la que fuera la so casa, siendo amás xugadores bien queríos polos aficionaos brickers.

Buscaba el Roces apertar bien enriba. El campu rápido y la fuerte presión visitante evitaba’l bon xuegu. Los de Roces yá nun llucen esa inocencia de la primer xornada de lliga, maurecieron, y yá saben a que se xuega en Tercera. Ello ye que el primer plasmu diéronlu los visitantes.

Indecisión ente Lozano y Davo, el balón llávaselu Chema, pero’l so disparu ye salváu so palos. Al Ciares mientres-y costaba crear oportunidaes. La primera foi para Beni, pero’l so remate de cabeza díbase alto.

Nun yera día de munches ocasiones. Pol Ciares, Cris yera quien más lo intentaba, pero tantu los sos centros como los d’Aitor nun atopaben rematador. Juan Carlos foise más arriba, y xuntu con Jimmy buscaben la llegada dende segunda llínea. Pero nun se xeneraben oportunidaes.

El partíu rompióse cuando a los 27 minutos Ponte diba lluchar pol balón con Edu. Ante la sorpresa xeneral, el porteru ex cearista diba col pie en cuenta de cola mano, el balón refugaba en Ponte, y Juan Carlos aprovechaba pa marcar a puerta vacida. De nuevu Juan Carlos viendo puerta.

Al descansu llegaba una de les meyores noticies del día. Pablo Martínez volvía al campu sustituyendo a Bryan. La vuelta del media punta xixonés yera bien esperada pola afición local. Y dexó rellumos, como una xugada per banda esquierda na que se foi con tranquilidá de too aquel xugador visitante qu’osó fae-y frente, con calma, con posa, como regatiando ensin querer. Finalmente’l so pase yera cortáu cuando peñeraba’l balón ente la defensa.

Llueu dexó sentenciáu’l partíu’l Ciares. Cuando namás trescurrieren 12 minutos de la segunda metá, Aitor ponía’l balón al segundu palu, toque de cabeza buscando’l palu contrariu y Prendes llegaba pa fusilar a Edu. La dedicatoria yera pal fíu de José Ramón Ortiz, sociu cearista fináu esta mesma selmana.

Detalle de Ponte, con un gran retayu dientro de la área, pero’l so disparu col esterior yera refugáu pola defensa. D’ende a la fin, poco xuegu, poques ocasiones. El balón pal Roces, pero impasibles los locales.

Parada de Davo a disparu de Omar dende l’estremu esquierdu de la área como única ocasión destacada de los visitantes.

Pa l’alcordanza queda l’episodiu de llocura transitoria protagonizada pol colexáu, amosando 8 tarxetes marielles en 9 minutos, al visitante Adro en dos vegaes, dexando al equipu visitante con un xugador menos pa encarar el descuentu. Cuesta ver la llista de tarxetes de la mañana de güei en relación col partíu que se vio, llimpiu, ensin entraes dures.

El Ciares asítiase cuartu tres la carambola de resultaos de la tarde. Posiblemente son l’equipu más en forma agora mesmu de la competición. Quieren repitir lo del añu pasáu. Quieren, y pueden.