[Ciares 2-1 Llanes] Ponte en forma
Un nuevu tantu del ariete na segunda metá decide’l duelu a favor del Ciares, nun partíu nel que los locales fueron bien cimeros.
Si a midida que te vas averando a los Pericones, oyes música soul, ye que xuega’l Ciares. Güei domingu, xugaba’l Ciares.
Abría fuego Rocío Gamonal, que yera homenaxada pola so victoria a escasos metros de La Cruz dos domingos primero, convirtiéndose en Campeona d’España. Unos segundos dempués empezaba la batalla.
Ciares 2 – 1 Llanes
Ciares: Davo, Fonso, Lozano, Beni, Aitor, Prendes, Jorge Vázquez, Pablo Martínez, Jimmy (Chery 56′), Cris Alonso (Rigo 63′), Ponte (Polo 72′)
Llanes: Chus, Pelayo (Bruno 75′), Toyos, Diego, Genaro, Aitor Tornavaca, Dani (Juanín 61′), Cueva (Keké 58′), Esteban, Jorge, Gael
Goles:
1-0: Pablo Martínez 28′
1-1: Esteban 39′
2-1: Ponte 58′
Árbitru: Rodríguez García, del Colexu del Nalón. Amonestó a los llocales Jorge Vázquez, Prendes, Miguelín, Chery y Fonso, y a Chuchi polos visitantes.
Incidencias: 400 espectadores nel Campu La Cruz nuna soliada mañana. Terren de xuegu algo blandu. Rocío Gamonal, reciente Campeona d’España de ciclocross, encargose de facer el saque d’honor.
La primer parte pintábase coloriada. Bien cimeros los locales, con munches llegaes per bandes, munchos centros, munchos disparos. Apenes empezaba’l partíu, yá enchía Cris Alonso per primer vegada, pero nun atopaba rematador el so centru dende banda esquierda.
El gol víase venir. Jorge Vázquez tamién tuvo’l so remate de cabeza, pero díbase-y alto. Como se dicía antaño, taba cociéndose el gol. Davo tamién facía’l so trabayu salvando un mano a mano embaxo.
Y el gol llegó. Con muncha habilidá revolvíase Jimmy na área, retayaba, pero’l so disparu lo repelíalu la escuadra. El balón cayía-y a Pablo Martínez que fusilaba. Segunda xornada consecutiva na que’l finu media punta xixonés ve puerta.
Con xusticia adelantrábase’l Ciares. Sicasí nun s’echó tras. Prendes y Cris Alonso volvieron buscar puerta. Y Jorge Vázquez, tres gran pase de Prendes, a puntu ta de marcar de cabeza.
Sicasí, nuna intrescendente xugada, l’árbitru señala penalti per emburrión de Prendes, tres falta llateral. Davo refugaba’l llanzamientu, pero’l refugue cayía-y de nuevu a Esteban, que marcaba.
Al descansu, paecía’l cuentu de nunca acabar. El Ciares meyor, el Ciares merez dise enriba, pero díbase col empate. Pero a los locales camudólos la suerte últimamente.
Nel minutu 58, Priendes ponía’l balón de banda dende la derecha. Xubía Beni a por ella, pero yera Ponte quien percima del porteru llaniscu facía xubir al marcador el segundu gol, a lo postrero definitivu.
Con media hora per delantre tocaba cambéu de planes. Agora les prieses tener el Llanes. Cris dexaba’l so sitiu a Rigo, formando pareya en banda derecha con Fonso, los habituales col marcador a favor.
Aitor Tornavaca, hasta apocayá capitán del Recreativu d’Huelva, tomaba los mandos del partíu. El Llanes empezaba a apoderar el partíu, pero ensin ocasiones clares. Nin tampoco escures.
Sufríase más na grada por apertar del marcador que polos méritos de los visitantes, que primíen más arriba, pero nun fueron capaces de facer sufrir a Davo mientres los segundos 45 minutos.
Gran victoria pal Ciares, que gana’l “goal average” particular al Llanes, rival direutu. Agora toca Pravia, dura plaza, quintu contra sestu. La llucha pol play off calezse. Y el Ciares tamién.