[Ciares 2-1 Sieru] Miguelín despídese con honores
El Ceares despídese del so entrenador con una trabayada victoria sobre’l Siero nuna tarde d’homenaxe en La Cruz.
[youtube]https://www.youtube.com/watch?v=oBvK2zeAciY[/youtube]
“Miguelín: La Cruz siempres va a ser la to casa” rezaba la pancarta que portaben los xugadores llocales. Nun yera un partíu cualquiera, yera la despedida del entrenador. El so caberu partíu dirixendo, nesti casu xuntu al banquillu.
Ciares 2 – 1 Sieru
Ciares: Llorente, Hevia, Fonso, Beni, Chery, Hugo, César, Pablo Martínez (Miguel 89′), Marcos Iglesias (Natan 58′), Cris (Chus Naves 69′), Ponte
Sieru: Kike, Cris, Trubi (Yerai 66′), Adolfo, Rober, Imanol, Borja (Pontu 65′), Abel (Bruno 81′), Edu, Oski, Saha
Goles:
0-1: Adolfo 12′
1-1: César 37′
2-1: Ponte 64′
Árbitru: Alonso de la Lama, del Colexu Uvieín. Amonestó a Fonso y Pablo Martínez pol Ceares, y a Imanol, Saha y Rober pol Siero.
Incidencies: 350 espectadores nel Campu de la Cruz. Los siguidores del Club Siero recibíen un descuentu especial nel preciu de la entrada. Terrén de xuegu n’escelentes condiciones. Los xugadores llocales portaron una pancarta de despedida al so entrenador Miguelín.
La victoria yera deseada, pero non obligada. L’extra de motivación nun podía convertise en presión. Intentaríase ganar pa dedica-y el partíu a Miguelín. Llogródr, los 3 puntos queden en la Cruz y mel recuerdu del entrenador llocal.
Como rival, llegaba’l Siero. Un club d’ampliu historial nel fútbol asturianu , mui bien reforzáu. Amás de dos de los integrantes del Ciares que disputaren play-off, sumense-yos nomes como los d’Osky o Saha. Con 7 puntos navegaba tranquilamente pela Tercera División.
Algunes novedaes nel once ciarista. Llorente facíase cargu de defender la portería. Chery retomaba los mandos al carril zurdu, y Cris sustituía nel estremu al sancionáu Raúl.
El partíu comenzaba eléctricu. Nun se cumplieren los dos minutos de xuegu cuando Ponte remataba na frontal del área pequeña un córner, pero-y marchaba un poquitín altu. Paecía que’l partíu llevaba guion Miguelín, dominar hasta marcar, y dempués ceder el balón.
Pero too cambió a los 12 minutos. Adolfo dispara una falta que salva la barrera per fuera y entra rasa y pegada al poste izquierdu de Llorente. Contratiempu inesperáu, xiru de guion, cambiu de planes.
A partir d’ehí, el Ciares volvióse más agresivu entovía. Ocasión pa Pablo Martínez, saca’l córner en cortu col sofitu de Cris, la paréla finaliza con un gran disparu que se va llambiendo’l poste izquierdu de la portería llocal. Posible penalti, tontu y involuntariu, por pisotón sobre Cris Alonso. Tamién César dispara un misil que rebotaba nun defensa cuando llevaba dirección gol.
El gol del empate llegaba casi al descansu. Un defensa visitante intenta despexar con una frivolidá, d’espuela, dentro del área pequeña, y el balón-y queda sueltu a César que fusila sin piedá a Kike.
La segunda parte tampocu empezaba como acabara la primera. Munchu más fríos dambos equipos, munchu más centrocampismu. El pocu peligru llevábalu Saha, más por presencia que por fútbol.
El gol llegó cuando menos s’esperaba. Gran balón de Dani Hevia dende la banda derecha, Pablo Martínez la dexa de cabeza, y Ponte col interior llevaba’l deliriu a les grades. Probablemente se facía xusticia a lo vistu nel partíu, pero nun paecía que lo ficiera a lo vistu na segunda parte.
Esta vez el Ciares nin tan siquiera cedió’l balón al Siero. Dominólu, controló’l partíu, y nun-yos permitió crear peligru. Sólu otra falta llanzada por Adolfo llevó’l sustu, pero perdíase cerca del palu. Hubo tiempu tamién pa perdona-y la espulsión a un desquiciáu Saha, por una escalofriante entrada sobre Fonso nos minutos de descuentu cuando yá tenía tarxeta.
Con 4 de 4 en victories como llocal. Llegaba’l momentu de deci-y adiós y de da-y les gracies a Miguelín. Nun merecía menos.