[Ciares 2-2 Marino] El Marino pesca un puntu por sorpresa
El Ciares dominó 80 minutos del alcuentrou, pero cede dos puntos tres d’un final llocu, con dos goles del Marino y un expulsáu por cada equipu.
El Boxing Day ye la fiesta anual que celebra’l club de la Teyerona. Sirve pa que los neños arropen a los xugadores del primer equipu. Esti añu, por caprichos del calendariu, tuvo que s’adelantar unos díes. Pero l’afluencia foi superior a la del añu pasáu, por mor del meyor tiempu, y al aumentu d’equipos filiales coloraos.
Ciares 2 – 2 Marino
Ciares: Davo, Fonso, Aitor, Beni, Chery, Juan Carlos, Pablo Martínez, Natan (Dani Hevia 64′), Rubo, Chus Naves (Hugo 79′), Marcos Iglesias (César 73′)
Marino: Davo, Pablo Suárez, Guaya, Espolita, Samuel (Álvaro 84′), Boris, Dani López, Geni, César (Pablo Hernández 29′), Omar (Riki 73′), Omar Sampedro
Goles:
1-0 Rubo 7′
0-1 Rubo 83′
2-1 Omar Sampedro 86′
0-1 Omar Sampedro 89′
Árbitru: Cano Fernández, del Colexu d’Uviéu. Amonestó a Juan Carlos y a Pablo Martínez pol Ciares. Expulsó por collorada direuta a Beni nel minutu 88. Pol Marino, amonestó a Omar, Guaya, Pablo Suárez, Samuel y Boris. Expulsó por roja directa a Álvaro nel mesmu minutu.
Incidencies: Partíu que servía para cellebrar el Boxing Day ciarista. Terren de xuegu en bones condiciones. Más de 400 espectadores en La Cruz. Aprovechose pa facer la tradicional recoyida de xuguetes navideña.
Pero la fiesta celebróla un inoperante Marino, que lleva un puntu gracies a los últimos 5 minutos, a los que llegara 2 a 0 abaxu nel marcador, tres d’un alcuentru gris.
Dos yeren les novedaes nel conxuntu ciarista. Rubo garraba’l puestu d’un Jimmy que marchó tocáu de Posada. Y Chus Naves facíase col extremu zurdu, sustituyendo a Cris Alonso, sancionáu durante 2 partíos pola so expulsión.
El partíu comenzó mui de cara pal Ciares. Gran balón dende la banda izquierda de Chus Naves. Baxalu Rubo con muncha tranquilidá, y define a la perfección.
Pudo ampliar la ventaya prontu Marcos Iglesias. Controlaba’l balón nel picu izquierdu del área, y el so gran disparu yera repelíu pola escuadra.
El Marino, a pesar de los innumerables históricos del mundu del fútbol, como Samuel, Omar, Boris, o Geni, nun yera capaz de crear peligru. De fechu, na primer parte, a pesar de tratar de dominar los últimos minutos, apenes foi quien a llevar peligru.
Na segunda parte, más de lo mesmu. El Marino, meyor en nomes que’n xuegu, nun yera capaz d’asustar a la afición llocal. Los únicos nervios veníen polo axustáu del resultáu. De fechu, la ocasión más clara foi pa Marcos Iglesias, tres d’una gran contra, que nun pudo definir al tapar bien l’arqueru y salvar el gol.
Tardó’l Marino en disparar ente palos. La primer intervención de Davo foi ente Dani López, nun disparu dende l’interior del área que s’envenenaba al tocar n’Aitor. Sin embargu salvaba Davo abaxu.
Paecía sentenciar el Ciares cuando Rubo marcaba un penalti cometíu sobre él mesmu. Gran contra, recorta dientro l’área y cae al suelu. Penalti, engañar al porteru. 2-0. Corría’l minutu 83. ¿Partíu cerráu?
Sólu un minutu dempués, Omar Sampedro recortaba distancies. Balón que supera pelo altu a Beni y Chery, vuelve a cae-y a Omar que dispara abaxu y recorta distancies.
Nun podía faltar la polémica. Pablo Martínez recibe una dura entrada de Geni. Beni intenta llanzar fuera pero’l balón nun llega a salir. El Marino sigue la xugada y se arma’l Belén. Como consecuencia, dos expulsaos, unu por equipu, Beni y Álvaro.
Paecía increíble viendo’l desarrollu del alcuentru, 2 goles en 3 disparos.
Pero pudo cambiar too cuando Rubo robaba un balón francu. Encaraben al porteru rival pero decidía xugala él cuando César paecía meyor situáu pa resolver.
Al final, empate. Inxustu, pero empate. Agora l’equipu toma un descansu, vuelve’l 3 de xineru, frente al Astur. El Boxing Day acabó con disgustu, pero la fiesta nun-y la quita naide.