[Ciares 2-2 Urraca] Topámonos con “Iglesias”
Dos goles del ariete xixonés torguen la victoria del Ciares, nun partíu nel que por dos causes tuvieron la victoria enfocada los teyeros.
[youtube]http://www.youtube.com/watch?v=MoNu3TV_VVI[/youtube]
Llegábase con ganes al partíu de la tarde del sábadu. L’alcuentru ente selmana frente al Universidá dexaba un sabor demasiao amargosu. A pesar del empate, y del desenvolvimientu, naide esperaba un desenllaz asina.
Ciares 2 – 2 Urraca
Ciares: Kike; Fonso, Lozano, Beni, Chery; Aitor, Juan Carlos; Pablo Martínez (Bryan 38′), Jimmy, Cris (Polo 62′) y Ponte
Urraca: Ricardo; Félix, Pelayo, Toyos, Edu, Iván (Pablo Díaz 85′), Rony, Cuanda (Ramonín 46′), Riki, Jorgito y Marcos Iglesias
Goles:
1-0: Jimmy 15′
1-1: Marcos Iglesias 20′ (P)
2-1: Aitor Cañedo 35′
2-2: Marcos Iglesias 65′
Árbitru: Cano Fernández (Nalón). Amonestó pol Ciares a Beni y Lozano y pol Urraca a Toyos, Riki y Rony. Espulsó a Adrián, segundu entrenador del Ciares.
Incidencies: Alcuentru correspondiente a la xornada trigésimo primera de la Tercer División d’Asturies acontecíu en La Cruz. Mediu millar d’espectadores, con nutrida presencia de la afición visitante. Terren de xuegu un poco blandu. En los prolegómenos guardose un minutu de silenciu pol tráxicu accidente d’avión en Francia y pola muerte del tíu de Lozano.
El Urraca transita tranquilamente pol Segundu Grupu de Tercer División. A pesar del gran equipu montáu, nin fríu nin calor na clasificación pal equipu llaniscu, del que s’esperaba fuera unu de los grandes candidatos a ocupar plaza de Play-Off.
Arrincaba fuerte’l Ciares. Cris Alonso, que sería una velea pa la defensa visitante mientres los primeros 45 minutos, acaballaba a los sos deleres. Apenes diera empiezu l’alcuentru, y atopábase frente al porteru, pasaba-yla a Ponte, pero nun llegaba al balón cuando namás yera precisu emburriala.
Al cuartu d’hora, gran balón en llargu, controla col muslu, centra cola esquierda, y Jimmy, que llegaba al segundu palu, fusila por baxu. Gran xugada, gran gol, y grandes minutos teyeros.
Pero llegaríase a la tónica habitual. Primer llegada en contra del Ciares, y primer gol. O primer penalti. Namás cinco minutos dempués d’adelantrase nel marcador, Marcos Iglesias tresformaba una pena máxima cometida por Beni.
Esos minutos, ente’l gol del Urraca, y el segundu del Ciares, fueron los más esconcertantes. Ensin un dueñu claru, el partíu volvíase sosu, como ante una tregua. Rompíala Aitor Cañedo, nun partíu redondu pela so parte, al rematar a la perfección un córner executáu dende banda esquierda.
Magar la mancadura de Pablo Martínez, sustituyíu por Bryan, el gol d’Aitor dio pasu a los meyores minutos locales. Primero Cris superaba al porteru visitante, retayaba al so par, y el so disparu ensin porteru yera refugáu. Nel córner, intentábalo Juan Carlos con gol olímpicu, pero estenaba Ricardo a córner de nuevu.
Córner que l’árbitru nun vio necesariu executar, ante’l plasmu bricker. Quince minutos pa folgar, quince minutos pa replantegar.
Na segunda metá, l’Urraca, por detrás nel marcador, decidió puxar con tou en busca del empate. Facíalo ensin ocasiones, más por obligación que por devoción, namás apoderando la posesión.
El Ciares dexó’l balón. Yeren los visitantes quien se víen obligaos a buscar l’empate. Nun importaba qu’apoderaren ellos, yera la so obligación.
La dinámica rompíala de nuevu Marcos Iglesias. El delanteru remataba de cabeza un centru dende banda esquierda y xubía l’empate al marcador. La celebración, tan risible como innecesaria, encendía un pocu los ánimos.
D’ende a la fin, dambos equipos nadaben ensin perder la ropa de vista. Naide quería perder, y daba la sensación de que naide podía ganar.
Teníala Polo, la postrera del partíu. Gran xugada, casi penalti, pero nun podía rematar. La xugada merecíalo, y el Ciares tamién.
A la fin empate. Llástima de primera parte onde casi podríen sentenciar. Agora toca ganar. La oportunidá’l Xueves. En Llugones. Nun falten ganes.