[Ciares 3-2 Tinéu] De pena máxima
Victoria importante pal Ciares nun partíu entreteníu, con singular arbitraxe a la hora de decretar penaltis.
Llegaben Ciares y Tinéu n’empate técnicu a esta xornada. Dambos con 36 puntos, al igual que’l Covadonga, empataren na primer vuelta, y sólo teníen sumáu 4 de los últimos 15 puntos en xuegu. El partíu yera, polo tantu, capital na llucha encarnizada que se ta llevando a cabu p’algamar una de les places disponibles pa disputar la Copa Federación la próxima temporada.
Ciares 3 – 2 Tinéu
Ciares: Davo; Dani Hevia, Aitor, Miguel, Chery; César (Juan Carlos 69′), Pablo Martínez; Natan (Fonso 64′), Jimmy, Cris Alonso (Ponte 74′) y Marcos Iglesias
Tinéu: Chema; Noé, Labrado, Marcos, Jonás, Aser, Carús (Juan 46′), Sergio, Juanín, Keke (Imanol 75′) e Imaz
Goles:
1-0 Marcos Iglesias 5′
2-0 Aitor 37′
2-1 Juanín 44′
2-2 Sergio 61′
3-2 Marcos Iglesias 76′
Árbitru: Morís Martínez (Oviedo). Amonestó a Jimmy, Ponte, César y Miguel pol Ciares, y a Sergio y Noé por el Tinéu.
Incidencies: Alcuentru correspondiente a la trixésimu segunda xornada del grupu II de Tercera División celebráu en La Cruz ente unos 300 espectadores. Terrenu de xuegu algo blandu, empiorando según pasaben los minutos. Guardóse un respetuosísimo minutu de silenciu en memoria del padre d’Hugo, xugador del Ciares.
El Ciares empezaba imponente. Cris Alonso martilleaba constantemente pela banda izquierda. Nun córner forzáu por él mesmu llegaba’l primer gol. Poníala “de cine” Pablo Martínez, remataba Aitor, y el rechace arremachábalu Marcos a les redes.
La primer parte tuvo claru color coloráu. El centru’l campu formáu por César y Pablo Martínez, con Jimmy per delantre, búsquense y combinen de manera constante. Cris pola so parte siguía col so rol, el de facer caer na llocura al llateral que cubra la so zona. Nuna d’eses díbase con un cañu, pero nel pase atrás Marcos Iglesias y Dani Hevia nun s’entendean y la ocasión marchaba al llimbu.
El segundu gol llegó otra vez a balón paráu. Nesti casu, Aitor Cañedo remataba en plancha al segundu palu un balón puestu dende la banda derecha. Gran gol pal central xixonés.
Col Ciares dominando, llegó la primera de les xugaes llamatives, y de los erros arbitrales. Marcos Iglesias encaraba al porteru visitante. El porteru arrebatába-y llimpiamente’l balón, pero l’árbitru, ente l’asombru xeneral, decretaba penalti y amonestaba al cancerberu. Posteriormente rectificaba a instancies del llinier y resolvía con bote neutral.
Na xugada siguiente, xustu cuando se cumplía’l 45, gran combinación de los visitantes que remataba Juanín axustándola al palu y entamando un partíu nuevu cuando paecía zarráu.
Nun balón perdíu en mediu campu pol Ciares, empataba’l Tinéu. Chery arrebataba-y el balón al delanteru tinetense, pero otra vez el Colexáu s’empeñaba en decretar penalti. Otra vez asombru xeneral. Los visitantes, sin tener creáu malpenas peligru, veíen cómo llevantaben un partíu nel que too apuntaba instantes antes que nun tenía munches posibilidaes.
El partíu había pegáu un xiru. Controlaben más l’esféricu los llocales, pero los visitantes paecía que podíen pegar un sustu, salíen a la contra con pocos xugadores pero mui rápidu.
Zarraba l’árbitru la so actuación decretando un penalti, mui tibiu, por un presunto agarrón sobre Marcos Iglesias. Nun fallaba l’ariete xixonés, que con 17 dianes esta temporada, cuenta con unos números escándalosos.
D’ehí al final, supo sufrir el Ciares na defensa, pese a los dos sustos que daben los tinetenses nel tiempu de descuentu.
Victoria importante ente un rival directu. Agora toca una de les places más complicaes, Ganzábal, frente a un Llangréu que venía llanzáu, aunque güei el Caudal lu frenara llixeramente. Partíu nel que va tocar sufrir pa traer algo positivu. El sábadu, más.