[Ciares – Trival Valderas] Fútbol de barriu
El domingu a les 17 hores, dos barrios humildes de clase obrera, van apostar el partíu d’ida del play off d’ascensu a Segunda B. Dos equipos apurríos al so barriu y viceversa, y dos equipos que van tratar de llevase cierta ventaya al partíu de vuelta.
El bombu foi más benévolu nesti sortéu col desplazamientu, amenorgáu a la metá. Pero foi caprichosu col rival, deparándonos unu de los más fuertes, el Trival Valderas.
L’equipu madrilanu del barriu de San José de Valderas quedó campeón nel grupu madrilanu de Tercer División. Yá de por sí, eso indica’l potencial del equipu. A ello hai que sumar los 83 puntos, lo que cierra unos númberos espectaculares.
Al igual qu’el Ceares, nun ye un equipu descomanadamente goliador. Pero nun ye un datu a tener en cuenta, si afitámonos nos rexistros de puntos. Casuco na anterior eliminatoria falaba del escasu rendimientu goliador del rival, sicasí eso númberos nun yeren reflexu real de la futura eliminatoria.
Fácil buscar puntos a favor del Trival, y difícil buscar los negativos. Sobre’l campu, van vese dos estilos distintos de xuegu. El Ciares busca más la ellaboración del xuegu, ente que el Trival xuega más directu, buscando la segunda xugada. Enforma xuegu por bandes, con dos delanteros bien móviles, y al empar bien goliadores (35 goles ente dambos), estremos, y llaterales ofensivos. Los 4 de tras del Ciares tendrán de tar sollertes pa tratar de restar les acometíes ofensives.
El Ceares va buscar tener el balón y movelo rápido al llegar a zona de trés cuartos. La velocidá na última parte de la xugada paez l’arma más eficaz nesti enfrentamientu.
Sicasí, la eliminatoria dura 180 minutos. El Ceares va tratar de llegar vivu al partíu de vuelta, que se va apostar el domingu 8 pela mañana. Y quiciabes nos dean otra allegría. ¿Por qué non?