[COMUNICÁU OFICIAL] Resolución de los órganos disciplinarios

El Gijón Fútbol Femenino, en rellación cola recién resolución de los órganos disciplinarios de la RFFPA, quier comunicar lo siguiente:

1. Agradecer a les persones responsables del Tineo FS la so actitú y aiciones a lo llargo de todu esti procesu, nel que siempres tuvieron al llau de les nueses xugadores y amosaron una collaboración total, poniendo la reparación y l’exemplu de lo que debe ser el nuesu fútbol base penrriba de cualquier otra circunstancia o posible consecuencia. La nuesa más sincera gratitú y almiración.
2. Manifestar que aceptamos la resolución de los órganos disciplinarios de la RFFPA, de la que tuvimos sofitu y asesoramientu en tou momentu al traviés de la so estructura de proteición al menor, pero ensin dexar de poner de manifiestu la necesidá de que estes competiciones organizaes pola RFFPA, pero non dependientes de la mesma, cuenten nel futuru con protocolos y control asemeyaos a los que tienen les federatives, yá qu’esto supondría un ameyoramientu de la competición en sí mesma ya una mayor proteición pa toles persones implicaes. L’ausencia d’actes correutamente cumplimentaes qu’amostrasen lo asocedío nos partíos, como por casu la so interrupción por incidentes de públicu, provocó que namás el club que actuó de bona fe reconociendo los fechos fuera sancionáu, lo cual supón una inxusticia, pero que foi inevitable poles garantías probatories que tien de tener cualquier procesu d’esti tipu.
3. La rotura de rellaciones por parte d’esti club col Racing de Mieres FS y col Ovifem FS debido a les alegaciones presentaes, que non solo nieguen los fechos, sinón que lo faen con argumentos y formes inaceptables, acusando a les propies families de les xugadores y al nuesu personal de mentir o incluso de provocar los incidentes. Esto va tener como consecuencia nun solo la interrupción de cualquier rellación institucional, sinón tamién la deportiva nel ámbitu del fútbol sala base, non presentándose los nuesos equipos a xugar los partíos qu’heban de disputar contra dichos clubes por non constituir espacios seguros y afayadizos pa les nueses xugadores. Va tener consecuencies deportives pal nuesu club, pero entendemos que sobradamente xustificaes.
4. Agradecemos a la prensa y a los medios de comunicación tola atención y difusión recibida nel nuesu intentu d’aturar lo que taba asocediendo y, reiteramos, dempués d’intentalo privao enantes, pero consideramos que yá desplicamos con claridá y detalle lo asocedío y polo tanto remitímonos a esti comunicáu pa cualquier comunicación. Creyemos que nun ye esti club quien, en cualquier casu, tien de dar esplicaciones.

Atentamente, la Xunta Directiva del Xixón Fútbol Femenín.Gijón Fútbol Femenino.