[Condal 2-0 Ciares] El Ciares nun pudo col Condal de Noreña
El conxuntu xixonés sufrió dos mazazos al entamu de cada metá y xugó yá condicionáu tol partíu, nel que falló un penalti.
[youtube]https://www.youtube.com/watch?v=H-JIdI7Ik84[/youtube]
Nun pudo’l U.C. Ceares dar la sorpresa en Noreña ante’l Condal, que sigue líder y ensin baxar el ritmu de resultancies. Los de Miguelín plantegaren nun principiu salir más ofensivos que de costume, un pequenu riesgu que nun taba de más correr si quería llevase un gran premiu del Alejandro Ortea. Asina lo fixeron y salieron con Polo y Ponte enriba. Sicasí, a la fin nun pudo llograr esi premiu, y con esta derrota pierde un pocu’l pasu de los equipos que lluchen por entrar en puestos de playoff. Queden entá xornaes pa lluchar por ello y de xuru qu’el Ciares siguirá intentándolo hasta’l final.
Condal 2 – 0 Ciares
Condal: Lastra; Zapico, Óscar (Aitor Suárez 69′), Mori, Javi Menéndez, Pablo Hernández, Rueda, Carly, Javi Álvarez (Carlos Peña 51′), Xabi Semedo y Jairo Cárcaba (Juanín 77′)
Ciares: Davo; Fonso, Lozano, Beni, Aitor Cañedo, Pablo Martínez (Chery, min.72), Jorfe, Juan Carlos, Jimmy (Cris 70′); Polo y Ponte (Bryan 68′).
Goles:
0-1: Jairo Cárcaba 1′
0-2: Javi Álvarez 48′
Árbitru: Fernández Buergo. Amonestó a Óscar (44′) pol Condal; y a Lozano (35′), Cris (80′) y Fonso (90′) pol Ciares. Expulsó con collorada direuta a Jorge Vázquez (7′) pol Ciares.
Incidencias: Alcuentru correspondiente a la xornada 30 de la Tercer División asturiana. Partíu disputáu nel Alejandro Ortea, de Noreña.
El partíu torcióse llueu pa los de Miguelín, que recibieron nel primer minutu de xuegu un gol de Jairo Cárcaba a centru de Carly. El gol nun tresmanaba, sicasí, los planes del conxuntu teyeru, qu’entrara al partíu decidíu a atacar. Sicasí, atopose con un Condal bien fuerte en defensa, como mientres tola temporada, lo que favoreció que los brickers gociaren de bien poques oportunidaes clares mientres la primer metá. Sía que non, cola ventaya nel marcador el Condal tampoco tuvo especiales brengues ofensives.
Cualquier intentu del Ciares de da-y la vuelta al alcuentru atayose a los trés minutos del segundu tiempu, cuando Javi Álvarez unvió a la rede un refugue na área teyera. Poníense les coses bien fees pal conxuntu xixonés, que vía que tenía que remontar dos goles a un equipu que casi nun encaxa. Con tou, sí goció de más opciones na segunda metá; la primer clara un penalti cometíu por Mori sobre Juan Carlos, qu’el mesmu centrocampista del Ciares s’encarga de llanzar al llargueru. Yera una oportunidá única pa encurtiar distancies y meter presión al Condal; y más tarde echaríen de menos el penalti falláu, porque llegó otra ocasión clara que pudo significar otru gol pa los teyeros. Ente Polu y Ponte iguense pa unviar el balón a la portería local col porteru vencíu, pero la defensa sacó so palos.
El partíu terminó entá peor pal Ciares, que se quedó con diez hombres pola espulsión de Jorge Vázquez con tarxeta collorada direuta. Asina, los de Miguelín vuelven de vacíu del Alejandro Ortea y tendrán de pensar yá en recuperar el miércoles el terrén perdíu ante’l Condal. Y ye qu’esti próximu día 25 de marzu xugará’l partíu suspendíu correspondiente a la xornada 25, que va enfrentar a los teyeros col Universidá d’Uviéu.