[Cuadonga 1-2 Ciares] Polo xela El Rabanal
El Ciares tráise los 3 puntos de El Rabanal, sofitaos nuna gran segunda parte en que por momentos raspiaron la excelencia.
Llegaben los dos equipos pareyos al alcuentru de la tarde-nueche del sábadu. El Cuadonga namás 3 puntos percima. Na alcordanza, l’alcuentru del añu pasáu, cuando’l Ciares ganaba por 1-3 y casi sentenciaba a un Chiqui de Paz que llegara al Rabanal ante gran espectación.
Cuadonga 1 – 2 Ciares
Cuadonga: Aitor, Castañón, Negredo, Pelayo (Enol 80′), Clemente, Peces, Pablo Suárez, Jaime, Porto, Meji, Diego
Ciares: Kike, Fonso, Lozano, Beni, Aitor, Prendes (Jorge Vázquez 43′), Juan Carlos, Piñera (Ponte 75′), Jimmy, Chery (Bryan 55′), Polo
Goles:
1-0: Negredo 73′
1-1: Ponte 79′
1-2: Polo 90′
Árbitru: Delgado Fernández, del Colexu de Avilés. Amonestó a los locales Enol y Porto, y al visitante Fonso.
Incidencies: 300 espectadores presenciaron l’últimu partíu enantes del parón navideñu, casi la metá d’ellos seguidores del equipu visitante. Terren de xuegu en perfeutu estáu.
Na primer parte’l Cuadonga tuvo más tiempu’l balón, lo que nun significa que fuera meyor, a cencielles atropó más posesión. El balón nun acababa de pasar por Juan Carlos, y el Ceares sufría na construcción.
Sicasí, la más clara foi pal Ceares. Fonso empezó a demostrar que diba ser protagonista y disparaba, el refugue cayía-y a Chery cola portería vacida, pero el so disparu salvávalu la defensa. Nel contraataque, casi marca’l Cuadonga. Llei de Murphy elevada a la máxima potencia.
Col tiempu casi cumplíu, Prendes, el stopper del Ciares, dexaba’l so puestu a Jorge Vázquez, con perfil más constructor. El polivalente xugador xixonés notó molesties na so rodía y prefirió nun arriesgar.
Col descansu, acabábase la etapa del Cuadonga siendo meyor. Y llegaba la del Ciares. L’equipu visitante non yá demostró que ye bien malo de bater, tamién demostró que tien fútbol y calidá pa regalar.
Auténtica exhibición de fútbol teyeru na segunda metá. El Cuadonga, un equipu fechu a golpe de talonariu, ensin remacariar recursos, amosóse incapaz de frenar a unos visitantes crecíos.
Magar nun se dispunxo d’ocasiones clares, salvu disparos de media distancia, l’equipu foi meyor, l’equipu quixo ganar. Pero, tou púnxose cuesta arriba cuando un córner llanzáu al segundu palu yera rematáu a gol por Negredo. Namás quedaben 17 minutos per delantre. La segunda derrota de la temporada taba cerca.
Pero llegó posiblemente’l meyor cuartu d’hora de la temporada. Bryan buscaba l’unu contra unu per banda, Aitor sacó’l guante a pasiar y creaba peligru en cada córner. La meyor versión bricker.
La primera teníala Beni. Poníala Aitor nel puntu de penalti, cai-y el balón al central teyeru, pero enllénase de balón y el so disparu diba llambiéndose-y el llargueru.
De nuevu ponla Aitor, y esta vegada sí, Ponte entró como un Sputnik y nun perdonaba al Aitor uvieín y empataba l’alcuentru. Nun había tiempu apenes pa les celebraciones. Yeren meyores y queríen dise colos 3 puntos.
Nel 90, xugada de tirallinies. Ponte pidíala a la cabeza nel saque de banda de Fonso. Ende foi-y. El balón acaba llegándo a Jorge Vázquez que saca tola so calidá a rellucir y asitia el balón percima de la defensa al desmarque de Fonso, qu’ante’l porteru déxala a Polo que fusila. Yera’l 1-2, y el minutu, el 90.
La celebración, l’habitual. Ensin llamentar víctimes. Creemos.