[COMUNICÁU OFICIAL] Denuncia a los ataques del Patronatu Deportivu Municipal de Xixón

Nos postreros tiempos tanto Gijón Fútbol Femenino como Unión Club Ceares tamos asistiendo con estupor a una serie de cámbeos de criteriu que mos tán dificultando enormemente la nuesa llabor y que espeyen el valor ningún que pela parte del Patronatu Deportivu Municipal se-y da a los nuesos proyectos.

La retirada del conveniu que dende fae más de 15 años tinía l’UC Ceares y pol cual llevaba Xixón na so camiseta. Esti conveniu algamaba una cifra pequeña pero importante del presupuestu del club (6000€, alredor del 5%). Facer notar qu’esta cantidá caltúvose mientres la temporada na que l’equipu tuvo na 2ª RFEF, ya que, siendo impropia de la categoría (otros conceyos sofitaron a los sos clubes con 10 o 20 veces más), entendimos nesi momentu que nel casu de Xixón un aumentu podría comprometer el presupuestu municipal y perxudicar a otres entidaes deportives de la ciudá. Ye triste ver qu’esi sofitu pequeñu se retira dende’l PDM por un cámbeu de criteriu,sin tener en cuenta esti fechu, ni la llabor social, ni la llaboral (contando’l club con mozos con ficha profesional ya alta en seguridá social) que se realiza y nun reconociendo l’estatus nacional de la 3ªRFEF.
La forma de dicha retirada, d’improvisu y col plazu pa optar a cualquier otra ayuda ya vencíu. Esto supón una irresponsabilidá ya un doble agraviu a la nuesa entidá.
La retirada del conveniu de la seición de fútbol del Gijón Fútbol Femenino, motivada teóricamente pol so descensu pero realizada enantes de que se confirme’l mesmu por posibles renuncies d’otros clubes, y sin tener en cuenta que tal decisión sin preavisu puede provocar un pasu atrás en tola estructura organizativa y dificultar que l’equipu pueda recuperar la categoría cuanto enantes, amás de xenerar incertidume institucional y comprometer el so futuru. Pa más agraviu, en descensos d’otres entidaes en temporades anteriores, siempres se-yos caltuvo los convenios mientres un tiempu, actuando como “fondos paracaíes”, daqué lóxicu nos nuesos díes y que ye la norma en estes situaciones.
La cantidá del conveniu del Xixón Fútbol Femenín de Fútbol Sala, que xubió a 2ª División, segunda categoría del fútbol sala nacional, queda mui per debaxo de les ayudes que reciben otros equipos de la ciudá nuna categoría similar (recibirá menos del 50%). Los proyectos medren cuando se sofiten, d’ello tenemos bonos exemplos na ciudá. Si nun se sofiten, especialmente cuando n’otros territorios sí lo faen, les oportunidaes piérdense.
El desconocimientu de dichu ascensu, nun asistiendo al play-off nengún representante del PDM, pero amás teniendo que ser el club quien informase al PDM de dichu ascensu énte la notificación de la retirada de convenios mentada anteriormente. Hai que destacar que nengún equipu de fútbol sala de Xixón algamara nunca esta categoría pero el valor que se-y dio fue cero a tolos niveles.
Yá por último y recién asocedía, la esclusión de les categorías territoriales femenines de la llinia de subvenciones de Fomentu del Fútbol Base pa la presente convocatoria, categorías nes que compiten los nuesos equipos B y C, xuveniles y cadetes respectivamente, al nun esistir categorías cadete nin xuvenil exclusivamente femenines. Esti cámbeu de criteriu xenera una inxusticia al respeutu del fútbol masculín y rompe un consensu que databa de fae más de una década.

Ye por tolo ello que dende’l Xixón Fútbol Femenín y l’Unión Club Ceares queremos mostrar el nuesu malestar, estupefacción pero sobre too decepción cola falta de sofitu y apreciu por parte del PDM y el escasu valor que dende’l mesmu se-y da a un históricu del fútbol femenín xixonés con 25 años a les sos espaldes, que inclúin xugar na la máxima categoría nacional, y a un club de barriu como l’Unión Club Ceares qu’algamó, con una escasez de recursos y sofitu evidente, cotes reservaes a entidaes con munchu más potencial económicu. Tolo ello ensin perder de vista la so llabor social y cultural nel barriu de Ciares.