Na temporada de 1964/65, siendo presidente D. José Ramón Elvira Sastre, dempués de militar en categoríes rexonales el club algama l’ascensu a Tercera División por primer vez, anque diba volver a baxar al añu siguiente.

Hasta los años setenta’l club xuega per diferentes campos de la ciudá hasta que por fin, a mediaos d’esa mesma década, cola construcción del campu de La Cruz, l’Unión Club Ceares puede xugar nel so barriu. La Cruz construyóse enfrente de les viviendes obreres de La Teyerona, nun terrenu dientro de lo que güei formen Los Pericones.

Hasta 1986 siguió militando en categoríes rexonales cuando llogra volver a la categoría nacional calteniéndose ellí dos temporaes consecutives. Nes temporaes 2001-02 y 2002-03 consigue dos ascensos consecutivos dende Primera Regional hasta Tercera División, l’últimu de la mano de Rogelio García qu’entrenó al equipu durante siete años, con un breve paréntesis en 2007, consiguiendo la primera temporada’l citáu ascensu y manteniéndolu en Tercera les seis siguientes, lo que supón el mayor períodu del club nesta categoría.

En 2009 Florentino Angulo entrenó al club, dempués de que xente como José Antonio Redondo o otra vez Rogelio García entrenaren al equipu.

Na Temporada 2011-2012 el club sufre un xiru de 180º al facese cargu una directiva nueva con una llínia crítica contra’l fútbol negociu, reivindicando una visión popular y social d’esti deporte, más asemeyada a otros clubes del movimientu del Fútbol Popular.

No deportivo, con esta xestión nueva, el primer añu consíguese salvar la categoría, oxetivu que sigue manteniéndose con humildá temporada tres temporada dende entós, aspirando siempre a más aún teniendo los presupuestos más baxos de la categoría.

No social, dende que la nueva directiva ta al cargu aumentó la masa social, implicando al barriu y a los socios y socies cada vez más na xestión del club, faciendo conceyos, recoyíes d’alimentu o material escolar, alcuentros lliterarios, manteniendo contactu cola AAVV de Ciares, etc.

Florentino Angulo dexa pasu a Nacho Cabo na Temporada 2012-13. Baxo’l mandu de Nacho Cabo naz el nomáu Ciares de los récors, calteniendo nun sólo la categoría, oxetivu primariu del club, sinón batiendo récors de’imbatibilidá del club, faciendo de La Cruz una fortaleza y algamando’l club por primer vez na so historia xugar la promoción d’ascensu a Segunda B. Nesta fase de promoción l’Unión Club Ceares enfréntase na primer vuelta al Águilas F.C pasando de ronda pa despedise del suañu al perder contra’l madrilán Trival Valderas.

Demientres esta xestión nueva fueron creándose añu a añu más categoríes dientro del fútbol base, teniendo un pesu enorme dientro’l club, dientro d’un ambiente familiar y cercanu, nel que los neños disfruten practicando un deporte amás de meyorar técnicamente, fomentando yá nestes categoríes la cooperación, el respetu, l’esfuerzu y regugando los aspectos más negativos que se ven diariamente na sociedá, y por ende nel fútbol, como son el racismu, la homofobia y especialmente el sexismu.

Toos estos proyectos culminen na Temporada 2015-16 na creación de la Escuela Mixta de Fútbol. La EFM naz de la collaboración ente’l U.C Ceares y el Gijón Fútbol Femenino col oxetivu de crear un fútbol base pa toes. Un fútbol nel que toes temos a gustu, collaboremos y sintamos nuestru, fomentando amás de técnica deportiva, pasión por un deporte y unos valores dignos pa estes categoríes que van ser el futuro del club.

Non menos merecío por inesperao, na temporada 20/21 l’equipu algama el campeonato de la 3ª División asturiana ya’l ascensu a la nueva 2ª RFEF, categoría que sostituye a la 2ªB