[L.lenense 1-1 Ciares] Munchu dominiu, pocu premiu

El Ciares xuega un gran partíu, con una enorme segunda parte, pero namás ye capaz de gatuñar un puntu n’El Sotón.

[youtube]http://www.youtube.com/watch?v=EHIar9Difgs[/youtube]

Ensin ser un día descomanadamente fríu en comparanza colos anteriores, el partíu esfreciose pa los visitantes namás empezar, cuando’l colexáu señalaba lo único que nun paecía: penalti. Paecía fora de la área, paecía xuegu peligrosu, y, de decretar penalti, tamién paecía tarxeta collorada pa Davo. Pero señaló pena máxima pa plasmu de propios y estraños.

Rubén Valdés nun perdonaba y empezaba un partíu nuevu con poco menos de noventa minutos per delantre. Remar a rodapiellu.

Tardó’l Ciares n’entrar al partíu, pero tamién el L.lenense, en situación crítica, salióse bien llueu d’él. Con marcador a favor, los de Chiqui de Paz teníen una clara ocasión p’apertar más y buscar los trés puntos. Sicasí, perdiéronse en múltiples perdes de tiempu y metiéronse mui cerca de la área defendida por Segura.

Empezó a carburar el Ciares, cada vez llegaba más arriba, y cada vez el L.lenense metíase más tras, sobremanera con Chery y Polo como protagonistes. La primer ocasión llegaba con discutiniu. Paecía mano de la defensa local dientro de la área tres control de Juan Carlos.

El L.lenense llevó muncho más peligru nesta primera que na segunda. Primero Naya llantábase ante Davo tres gran paré, pero esbarataba perfectamente’l porteru xixonés. Na segunda raspióse’l esperpento. Fora de xuegu de tres metros que sosprendió inclusive al delanteru local. Tol mundu paraba sacante Davo, pero’l balón estrellábase nel poste.

A midida que pasaben los minutos multiplicaben les llegaes de los visitantes. Gran xugada del debutante Berto Vallina, internábase a la área tres gran control, pero’l so centru de la muerte díbase a córner. Saque de banda en llongura de Priendes, toca de cabeza Beni, y el disparu de Jimmy esvíalu Segura.

Cocíase’l gol. Y sirvia de nuevu Pablo Martínez. Balón que-y cai na frontera y de primeres marca pembaxo al palu derechu de Segura. Yera’l postreru sospiro antes del descansu.

Gol nun momentu psicolóxicu, y el Ciares definitivamente meyor llantáu nel campu que los locales. El pronósticu camudara. Agora pintaba visitante.

Y namás empezar, casi se fai realidá’l pronósticu. Cabezada acrobática de Priendes pero Segura volaba, y quiciabes s’afataba, pa estenar a córner.

Darréu Aitor Cañedo sosprendía, y cerraba enforma’l llanzamientu de falta dende banda derecha, pero de nuevu Segura mandaba a saque d’esquina.

A estes altures el dominiu visitante yera absolutu. A Juan Carlos díbase-y alta una falta en bona posición, y nun centru cola maniega tampoco atopaba rematador. Cada córner, cada falta, cada saque de banda, llevaben peligru.

Tanto dominiu vía sobre’l campu, qu’hasta pasáu’l minutu sesenta’l L.lenense nun daría sensación de peligru. Y sería tres una contra, nun córner visitante, pero’l pase de Naya cortábalu Lozano cuando esperaba’l balón Rubén Valdés.

La postrera clara teníala Pablo Martínez, gran xugada de Cris Alonso, que se foi de toos, mete’l balón pa la mediapunta, que busca col interior el palu curtiu. Pero de nuevu Segura unvia’l córner.

Final, cola sensación de ser un bon puntu, pero curtiu nos merecimientos. N’ocho díes clarificaranse enforma les coses, nos duelos con Pravianu y Tiuya, los dos con golor a partidazos.

Si te gusta’l fútbol, tas de suerte. Esfrútalo esta selmana.