[Llanera 0-1 Ciares] El Ciares pide otra ronda
El Ciares gana pela mínima en Llanera y casi asegura la so participación na próxima edición de la Copa Federación.
Catorce puntos son los que separen agora mesmo al Ciares del duodécimu clasificáu, precisamente’l Llanera, que ye agora mesmo’l equipu que marca la zona clasificatoria que nun disputaría Copa Federación el próximu veranu. Catorce puntos paecen munchos, sobre too a tenor d’ambes tendencies. El Ciares, 13 de 15, los de Llanera nel mesmu períodu un solu puntu.
Llanera 0 – 1 Ciares
Llanera: Gabri, Javi Alonso (Jonás, 70′), Adrián, Esteban, Ángel Luis, Hugo Sánchez, Miguélez, Aitor Tornavaca, Didi (Guille 81′), Cris Alonso, Yoni
Ciares: Nacho; Fonso, Aitor, Beni, Chery; Juan Carlos, Hugo, Dani Peláez, Cayarga (Cris 83′), Marcos Iglesias (Iván 91′), Javi Gutiérrez (Miguel Obaya 65′)
Goles:
1-0 Juan Carlos 51′
Árbitru: González Suárez. Amonestó a Javi Alonso y Cris Alonso pol Llanera, y a Fonso, Beni y Marcos pol Ciares.
Incidencies: 300 espectadores nel Pepe Quimarán de Llanera. Terrenu de xuegu sintéticu.
El prau del Llanera ye pequeñu. Mui pequeñu. D’ehí lo particular del fútbol a disputar. Tino del Corzo optó por renunciar a les bandes y llenar el centru de xugadores. Salió-y bien la xugada.
Tres xugadores nel centru’l campu. Hugo, novedá nel once, afitábase per delantre la defensa. Aitor Cañedo, otru que volvía, diba al centru la defensa. Arriba, Cayarga y Javi, con muncha movilidá, buscaben surtir a Marcos Iglesias de balones.
Enfrente taba’l Llanera. Pese a ser un recién ascendíu, el so proyectu ye ambiciosu y algamó confeccionar una plantiya mui interesante, con xugadores de caláu. Empezaría mui mal la temporada. Foi recuperando, y agora de nuevu paez baxar el ritmu. El so antecesor na tabla, un Colunga tamién n’hores baxes, aventáxalu en 6 puntos, polo que la so presencia en Copa Federación paez complicase.
Siempre tuvieron cómodos los teyeros nel partíu. Pese a lo complicáu d’adaptase a un terrenu tan llimitáu, los llocales nun crearon escesivos problemes. Quiciás tardó demasiáu en llegar el gol visitante, y nun foi a pesllar l’alcuentru cuando se pudo. Pero la victoria, pese a lo axustáu del resultáu, foi xusta.
Poques ocasiones na primer metá por dambos bandos. El Ciares buscaba de la mano, de les manes más bien, de Fonso crear peligru. Los sos saques de banda buscando a Beni creaben inquietú na defensa llocal en cada acercamientu. La ocasión más clara foi llocal, nun disparu violentu dende la frontal del área, que s’envenena al pegar nun defensa pero diba al llargueru.
Yá na segunda cambió’l panorama. Les llegaes visitantes sucedíense. Hasta en dos ocasiones se llegó a reclamar penalti nel área llocal, dambes por mano. La primera nun disparu dende dientro l’área, y la segunda nun intentu de centru de Marcos Iglesias.
Juan Carlos, el meyor xugador sobre’l verde ayeri, yera l’autor del gol de la victoria nun llanzamientu de córner que remataba picáu de cabeza.
Pudo sentenciar Marcos poco dempués, cuando-y caía’l balón na frontal del área pequeña, pero’l balón botaba demasiao alto y el remate marchaba per enriba del llargueru cuando’l porteru se veía superáu. Tamién Cris realizaba una gran xugada con cesión pa Marcos, pero atrapaba’l porteru nel últimu instante.
Resultáu xustu al final. El próximu rival ye’l Pravianu, curiosamente l’equipu que persigue al Llanera na tabla. El Ciares sigue en racha.