[Llanes 1-1 Ciares] Segunda metá d’alta escuela

El Ciares llévase un puntu de Llanes, pero pudieron ser trés en realizando una brillosa segunda parte d’alcuentru.

Muncha cara nueva nel once que disponía’l Ceares en Llanes. Fonso volvía al so llateral, Lozano yera titular, moviendo a Prendes a la posición de stopper, Raúl coyía l’estremu derechu, y Jimmy cayía a banda por que Pablo Martínez fuera l’enganche. Sorpresa al lleer l’alliniación. Pero nun había tiempu pa nada.

Los primeros 30 minutos pasaron ensin pena nin gloria. Nin Llanes nin Ciares llograben crear ocasiones clares. Dambos equipos abusaben del balón direutu, aprovechando les escases midíes del terrén de xuegu de San Xosé. Aitor Tornavaca polos locales, y Juan Carlos polos teyeros trataben de poner orde, pero nun yeren capaces d’asumir tol xuegu d’ataque de los sos equipos.

Foi dende’l minutu 30 cuando’l partíu volvióse eléctricu. Los locales entornáronse buscando’l gol, quiciabes non con un brillosu fútbol, pero sí con emburrie. Kike convertíase nel meyor xugador visitante, con tres intervenciones de méritu que salvaben los muebles a los de Miguelín, una d’elles con doble plasmu, tres repeler el llargueru l’espeye. Namás Ponte consiguía rematar nesta fase del partíu contra l’equipu local, pero’l so remate en plancha, tres toque de cabeza de Juan Carlos, yera atayáu por Chus.

Nel minutu 44 llegaba la primer de les xugaes polémiques del partíu. Tola espedición cearista llevábase les manos a la cabeza al ver al linier llevantar el banderín y decretar penalti tres una cayida per banda esquierda. L’árbitru facía casu al so asistente y señalaba los 9 metros. Aitor Tornavaca nun engañaba a Kike, pero’l disparu a la so derecha colábase por debaxu’l porteru visitante. A remar.

La segunda parte nun se paecía en nada a la primera. Apenes acababa d’empezar, Aitor Cañedo y Pablo Martínez prueben “gilicórner”. Resultáu: Agua. A la segunda ponla Pablo y Ponte álzase maxistral pa rematar. Al palu. El Ciares xuníase a la fiesta. Apertaben los brickers. Raúl causaba estragos pela so banda, y hasta en dos vegaes algamaba llínea de fondu y creaba problemes al porteru local. Pablo Martínez tamién tenía la suya. Chus convertíase nel héroe del Llanes.

Cada cambéu de Miguelín apurría más fútbol en mediu del campu a los teyeros. Primero yeren Pichón y Cris los qu’entraben al campu. Pablo Martínez baxaba a mediu campu a crear xuegu con Juan Carlos, y Cris triaba’l cal de la banda esquierda. Dempués yera Jorge’l qu’entraba al campu sustituyendo a Raúl. El Ciares a por toes.

Llegó’l gol, y va ser unu de los golazos de la temporada. Jorge Vázquez camuda’l xuegu, Pichón ensin dexala botar pon-yla a Juan Carlos, y el xixonés engánchala de volea. Trés toques, y el balón ensin tocar el verde. Xugando de primeres. Gol de pañuelos blancos.

Quería’l segundu’l Ciares, y pudo llegar. Ponte protexi’l balón na área local. Recibe una llave de yudu pero l’árbitru nun lo considera penalti ante la indignación visitante. Paecía claro. Y entá más. Ponla Pablo Martínez al segundu palu, Ponte nun llega, y el balón díba de nuevu al palu esquierdu de Chus. Xugada per banda esquierda de Cris Alonso. Va escontra’l centru pero’l so disparu vase por pocu. Yera la postrera.

Finalmente repartida de puntos. Una parte pa cada equipu, pero con munches más ocasiones visitantes que locales. El Ciares vuelve apuntar alto nesta temporada, por fútbol y por resultáos. El próximu domingu recibe al Pravianu, rival yá conocíu pola Copa Federación. A siguir la racha.